Պաշտպանության նախարարության շենքը շղթայված է
Անհետ կորած զինծառայողների հարազատները շարունակում են դեռևս առավոտյան ժամը 11:00-ից փակ պահած ՊՆ շենքի շրջափակումը։
ՊՆ շենքի մոտ ամիսներ առաջ տեղի ունեցած միջադեպերից հետո նախարարության ղեկավարությունը որոշել է ճաղավանդակներ դնել շենքի 2 մուտքերի մոտ։ Հենց այդ ճաղավանդակներն են շղթայել անհետ կորած զինծառայողների հարազատները և արգելափակել են աշխատակիցների ելումուտը։
168.am-ի տեղեկություններով` շենքում հիմնականում շարքային աշխատակիցներն են։ Ներսում է նաև ՊՆ փոխնախարար Արման Սարգսյանը։ Նախարարության այն աշխատակիցները, ովքեր նախարարության շրջափակման պահին եղել են դրսում, ապա փորձել են ներս մտնել, ՊՆ մտնել չեն կարողացել: Անհետ կորած զինծառայողների հարազատները նրանց մուտքը ևս արգելել են:
Շենքի մուտքերն ու ելքերը շղթայած անհետ կորած զինծառայողների հարազատները լրագրողներին թույլ չեն տալիս տարածքում նկարահանում իրականացնել:
Պաշտպանության նախարարության մոտ արդեն իսկ լարված իրավիճակն ավելի է լարվել, երբ ծնողները տեղեկացել են, որ Բաքվից Երևան է ժամանել դատարկ ինքնաթիռ, որով, ինչպես ավելի վաղ հաստատել էր Նիկոլ Փաշինյանի խոսնակը, պետք է գերիներ տեղափոխվեին Հայաստան:
