2021 թվականը մարմնամարզիկների համար շատ լուրջ տարի է լինելու. Հակոբ Սերոբյան
Հայաստանի մարմնամարզության ազգային թիմին դժվարին տարի է սպասվում 2021-ին: Այս մասին հայտարարեց Հայաստանի ընտրանու գլխավոր մարզիչ Հակոբ Սերոբյանը:
«Մինչ Վորոնինի մրցաշարը, մենք երկու ամիս առհասարակ չէինք մարզվել: Մեծ ազդեցություն ունեցավ պատերազմական իրավիճակը: Մեզ համար լավ էր, որ հասցրեցինք Մինսկում ուսումնամարզական հավաք անցկացնել, քանի որ կարողացանք մարզավիճակ ձեռք բերել: Սակայն այն գոհացուցիչ չէր: Արթուր Դավթյանը լավ մասնակցություն ունեցավ և կարող եմ ասել տարվա վերջին կարողացանք մեդալներ նվաճել»,-ասաց նա:
Սերոբյանը փաստեց, որ ինչպես ցանկացած հայ համար, այնպես էլ հավաքականի յուրաքանչյուր անդամ եմ դժվարին ժամանակներ էին:
«2021 թվականը մարմնամարզիկների համար շատ լուրջ տարի է լինելու: Գալիք տարի ունենալու ենք թե Եվրոպայի, թե աշխարհի առաջնություններ, այդ թվում ամենակարևորը` Օլիմպիական խաղեր: ՕԽ-ի համար վարկանիշային են լինելու հաջորդ տարի կայանալիք Եվրոպայի առաջնությունը: Չեմ կարող ասել, որ մեծ շանսեր ունենք ուղեգիր նվաճելու համար: Մարտին կլինի աշխարհի գավաթի խաղարկությունը, որից հետո պլանավորում ենք ուսումնամարզական հավաք Թբիլիսում և դրանից հետո Եվրոպայի առաջնություն»,-ասաց մասնագետը: Հավաքականի մարզչի խոսքով` պլաններում կան ևս մեկ բազմամարտիկի նախապատրաստել Եվրոպայի առաջնությանը, որտեղ շատ չնչին հնարավորություն կա ՕԽ-ի ուղագիր նվաճելու:
Սերոբյանն առանձնացրեց, որ Տոկիոյի 32-րդ ամառային Օլիմպիական խաղերից առաջ կլինի ևս մեկ ուսումնամարզական հավաք:
