«Պատերազմը չկա, բայց մենք շարունակում ենք տալ և տալ». Վազգեն Մանուկյան
«Տխուր օր է այսօր. չկան էն վառվռուն աչքերը: Մենք այսօր հավաքվել ենք, որպեսզի հիշատակենք մեր հերոսներին, որոնք նահատակվեցին՝ պաշտպանելով մեր հայրենիքը, մեր ժողովրդին և մեր պատիվը»,- Ազատության հրապարակում իր ելույթն այսպես սկսեց «Հայրենիքի փրկության շարժման» վարչապետի թեկնածու Վազգեն Մանուկյանը:
Հիշեցնենք՝ Ազատության հրապարակում մեկնարկել է Նիկոլ Փաշինյանի հրաժարականի պահանջով ընդդիմության հանրահավաքը, որին հաջորդելու է երթը՝ դեպի Սրբ. Գրիգոր Լուսավորիչ եկեղեցի, որտեղ Արցախի թեմի առաջնորդ Պարգև արքեպիսկոպոս Սրբազանը պատարագ է մատուցելու զոհերի հիշատակին:
«Առաջին պատերազմի մասնակիցներից և զոհվածներից շատերի հետ ես մոտ էի, ծանոթ էի: Մենք իրար հետ կիսում էինք մտքեր խարույկների մոտ, ռազմաճակատում, փողոցներում, և իրենք պատգամ են թողել, իրենք երազանք ունեին՝ այդ երազանքն էր, որ կառուցվի ազատ, անկախ, հզոր, ազդեցիկ երկիր՝ Հայաստան՝ Արցախի հետ միասին, որտեղ կյանքը լինի արդար, լինի բարեկեցիկ, բայց ոչ թե ընտրյալների համար, այլ ամբողջ ժողովրդի համար, որ իրենք հպարտանան իրենց երկրով, մրցեն ուրիշ երկրների հետ:
Նույն մտքերով էին տոգորված նաև այն տղաները, որոնք գնացին այս պատերազմ և զոհվեցին, այն զինվորները, այն սպաները, այն կամավորները, որ հենց առաջին կոչով գնացին պատերազմ և զոհվեցին, այս տարօրինակ պատերազմում:
Ես անվանում եմ տարօրինակ, բայց շատերն արդարացիորեն անվանում են ծախված պատերազմ: Այս պատերազմը կարող էր չլինել. կամ մեծ տգիտություն, կամ մեծ դավաճանություն էր պետք՝ բոլոր բանակցությունները տապալել, բոլոր դաշնակիցներին կորցնել, գրգռել դիմացինին»,- նշեց Վազգեն Մանուկյանը:
Նրա համոզմամբ՝ պատերազմում մենք կարող էինք հաղթել, եթե մինչև պատերազմը արվեր այն աշխատանքը, որը անհրաժեշտ էր. «Երբեմն ասում են՝ 2.5 տարին քիչ էր. 90-ական թվականներին մենք 2.5 տարում 0-ից սարքեցինք բանակ և խայտառակ պարտության մատնեցինք Ադրբեջանին: Այս նույն վիճակում Ադրբեջանն էր՝ խայտառակ պարտություն էր կրել:
Նույնիսկ, եթե պատրաստված չէինք, ծայրահեղ դեպքում՝ կարելի էր շուտ կնքել այդ պայմանագիրը, պատերազմի վերջը, երբ մենք կունենայինք քիչ կորուստներ և հազարավոր երիտասարդներ, որոնք հիմա Եռաբլուրում են, կվերադառնային իրենց ընտանիքներ: Դա չարվեց:
Եվ ի՞նչ վիճակում մենք հայտնվեցինք. անիշխանություն, անտերություն. պատերազմը չկա, բայց մենք շարունակում ենք տալ և տալ, եթե այսպես շարունակվի, շուտով աշխարհի քաղաքական քարտեզից կամ կվերանա Հայաստանը, կամ կդառնա մի այնպիսի խղճուկ պետություն, որին ոչ մեկը ուշադրություն չի դարձնի: Իսկ այդպիսի պետությունը չի կարողանա նաև իր ժողովրդի բարեկեցությունն էլ ապահովել. մենք հիմա գլորվում ենք այդ ճանապարհով»:
Վարչապետի՝ ընդդիմության միասնական թեկնածուն հիշեց Առաջին աշխարհամարտի վերաբերյալ Միացյալ թագավորության վարչապետ Ուինսթոն Չերչիլի դիտարկումները, որտեղ հիշատակում է նաև Հայոց ցեղասպանության փաստի մասին. «Ասում է՝ իրադարձությունները, ցեղասպանությունը բերեցին նրան, որ այդ հինավուրց և հետաքրքիր ժողովուրդն ընդմիշտ դուրս եկավ պատմական ասպարեզից: Բայց մենք ուժ հավաքեցինք, և 1988թ. Արցախի հարցով նորից մտանք պատմական ասպարեզ, մենք դարձանք պետություն, որի հետ պետք է հաշվի նստեն: Ինքը՝ պետությունը, կարևորագույն դեր էր կատարում այս տարածաշրջանում, հարգված էր ամբողջ աշխարհում: Ցեղասպանությունն ընդունում էին ոչ միայն գիտական անհրաժեշտությունից ելնելով, այլ նաև՝ հաշվի նստելով, որ գոյություն ունի հզոր Հայաստան, որը կարողացել է իր իրավունքները պաշտպանել:
Հիմա այն, որ Չերչիլը սխալմամբ մտածեց, որ ԱՀՊ-ն է մեր հետ արել, այժմ անում է Նիկոլը՝ նորից ընդմիշտ հանելով քաղաքական քարտեզից: Բայց ես համոզված եմ՝ մենք նորից ոտքի ենք կանգնելու, նորից կարողանալու ենք մեր իրավունքները պաշտպանել, ինչքան շուտ, այնքան ավելի լավ»:
«Մենք պետք է իրականացնենք մեր զոհվածների պատգամը՝ իսկապես ունենալ ազատ, հզոր երկիր, որտեղ մարդ հպարտությամբ է ապրում՝ ազատ, բարեկեցիկ, արդար միջավայրում, և դա մեր զոհվածների պատգամն է: Եկեք երդվե՛նք, որ այդ պատգամը կկատարենք»,- եզրափակեց Վազգեն Մանուկյանը:
