Մենք բոլորս միասին մեկ գլոբալ հայ ազգի մաս ենք կազմում. Քարդաշյան քույրերի կոչը
Աշխարհահռչակ հեռուստաաստղ Քիմ Քարդաշյանի քույրեր Քլոե և Քորթնի Քարդաշյանները ևս միացել են հանուն հայ ժողովրդի, հանուն Արցախի «Հայաստան» համահայկական հիմնադրամին նվիրատվություն կատարելու կոչին:
«Արմենպրես»-ի հաղորդմամբ՝ Քարդաշյան քույրերը տեսաուղերձներ են հղել «Հայաստան» համահայկական հիմնադրամի նախաձեռնած «Մենք ենք, մեր սահմանները. բոլորս Արցախի համար» վիրտուալ դրամահավաքին, քույրերը տեսաուղերձները տեղադրել են նաև սոցիալական ցանցերի իրենց էջերում:
Քլոե Քարդաշյանը մասնավորապես նշել է, որ շատ դժվար ժամանակաշրջան է Հայաստանի և Արցախի համար: «Ես այսօր այստեղ եմ՝ բարձրացնելու իմ ձայնը, որպեսզի երաշխավորեմ, որ տեղում մարդիկ սնունդ, ապաստան և բժշկական օգնություն ստանան: «Հայաստան» համահայկական հիմանդրամն աշխատում է անմիջականորեն նրանց հետ, ովքեր տուժել են այս ճգնաժամից ՝ տրամադրելու էական ռեսուրսներ»,- ասել է նա:
Քարդաշյանը շեշտել է, որ իր համար, որպես մոր, հատկապես կարևոր է մտածել երեխաների մասին: Նրանք չպետք է զգան բախումներից բխող վախն ու դժվարությունները: «Իմ մտքերն ու աղոթքները այդ երեխաների և նրանց ընտանիքների, նաև քաջ տղամարդկանց և կանանց հետ են»,- նշել է նա:
Քորթնի Քարդաշյանն էլ ասել է, որ իր համար մեծ պատիվ է այս դժվարին ժամանակահատվածում աջակցություն ցուցաբերել Հայաստանում և Արցախում մարդասիրական ջանքերին:
Քլոե և Քորթնի քույրերն իրենց ուղերձներն ավարտել են հետևյալ կոչով. «Միացեք ինձ՝ այսօր աջակցելու հիմնադրամին, դա կլինի սոցիալական լրատվամիջոցներում իրազեկում տարածելով, թե ընդամենը 1 դոլար նվիրաբերելով, ոչ մի ջանք փոքր չէ: Մենք բոլորս միասին մեկ գլոբալ հայ ազգի մաս ենք կազմում»:
Քիմ, Քորթնի և Քլոե քույրերը սոցիալական ցանցերի իրենց էջերում տեղադրել են նաև հիմնադրամի կայքի հասցեն: Քիմ Քարդաշյանը արդեն կատարել է 1 մլն դոլար նվիրատվություն:
Պատրաստեց Աննա Գրիգորյանը
