Խաղաղության Նոբելյան մրցանակը ստացել է Պարենի համաշխարհային ծրագիրը
2020 թվականի Խաղաղության Նոբելյան մրցանակի դափնեկիրը դարձել է ՄԱԿ-ի Պարենի համաշխարհային ծրագիրը։
Նոբելյան կոմիտեն նշել է, որ մրցանակը շնորհվել է «քաղցի դեմ պայքարի ջանքերի համար, այն տարածաշրջաններում խաղաղության պայմանների բարելավման համար, որոնք հակամարտությունների մեջ են, եւ շարժիչ ուժի դերակատարման համար, որը կանխում է քաղցը որպես պատերազմի զենք եւ հակամարտություններում օգտագործելը»:
Ծրագիրն ստեղծվել է 1961 թվականին ՄԱԿ-ի կառույցում՝ քաղցի եւ չքավորության դեմ պայքարելու համար: Նոբելյան կոմիտեն վաղօրոք չի բացահայտում խաղաղության մրցանակի հնարավոր թեկնածուներին, սակայն ԶԼՄ-ներում տեղեկատվություն է հայտնվում առանձին նախաձեռնությունների մասին: Մասնավորապես, հաղորդվել է ՌԴ նախագահ Վլադիմիր Պուտինի, ԱՄՆ-ի նախագահ Դոնալդ Թրամփի եւ ընդդիմադիր Ալեքսանդր Նավալնու առաջադրման մասին:
Ավելի վաղ հաղորդվել էր, որ Խաղաղության Նոբելյան մրցանակի հանձնման արարողությունը պլանավորվում է անցկացնել դեկտեմբերի 10-ին՝ առերես ձեւաչափով, բայց սահմանափակ թվով մասնակիցներով: Խաղաղության Նոբելյան մրցանակը հանձնվում է 1901 թվականից Օսլոյում Նոբելյան կոմիտեի կողմից՝ այն ֆիզիկական անձանց ու կազմակերպություններին, որոնք, կոմիտեի կարծիքով, նշանակալի ներդրում ունեն խաղաղության ամրապնդման բնագավառում, հաղորդել է «Ինտերֆաքս»-ը:
