«Միշտ չէ, որ հօդս ցնդած նշանակետերի և թիրախների անունները նշում ենք, բայց այնպես էլ չի, որ դա չի իրականացվում». Արծրուն Հովհաննիսյան
ՊՆ ներկայացուցիչ Արծրուն Հովհաննիսյանը գտնում է, որ ՀՀ վարչապետի մարտակոչը հստակ մեսիջներ և ասելիք ուներ, որի վերաբերյալ պետք է մանրամասներ ներկայացնել:
«Մենք հայտարարել ենք լիարժեք զորահավաք, դա շատ բնականոն պրոցես է այս բավականին բարդ ու ծանր մարտական գործողությունների պարագայում»,- նշեց նա:
Հարցին` երեկ հայտարարվեց, որ «հօդս է ցնդել Գյանջայի օդանավակայանը», նման այլ ի՞նչ դեպքեր են եղել, Արծրուն Հովհաննիսյանը չգաղտնազերծեց «հօդս ցնդած» թիրախների կամ նշանակետերի անունները` ասելով, որ միշտ չէ, որ դրանց անունները նշում են, բայց այնպես էլ չի, որ դա չի իրականացվում։
«Միշտ չէ, որ մարտական գործողությունների այս կամ այն մանրամասնությունը տեղին է հայտնել: Միշտ չէ, որ որոշակի այդ առանձին լուրերը, որ հայտնում ենք, իրենք ստատիկ բնույթ ունեն: Դրանք արագ փոփոխվում են, իրավիճակները շատ սուր դինամիկ և արագ զարգացման մեջ են: Սպասեք լավ լուրերի, միևնույնն է` հաղթելու ենք»,-շեշտեց Հովհաննիսյանը:
Անդրադառնալով երեկ ՊԲ–ի տարածած տեսանյութին, որում երևում էր` ինչպես են Ադրբեջանի զինվորները փախչում Մատաղիսից, Հովհաննիսյանը նշեց, որ այսօր էլ նույն բանը հարավային ուղղությամբ էր կատարվում, բայց այս պահին տեսանյութ չունեն ցույց տալու։
