Նիկողոսյանը գոհ է երիտասարդ հրաձիգների արդյունքներից
Հայաստանի հրաձգության հավաքականի մարզիչ Սեյրան Նիկողոսյանը գոհ է ներքին առաջնությունում երիտասարդ մարզիկների գրանցած արդյունքներից:
«Թույլ առաջնություն ստացվեց և մասնակիցների քանակն էլ շատ չէր, բայց դրա համար պատճառներ կան` կորոնավիրուսը: Թեպետ վերջին շրջանում ամբողջ օրվա ընթացքում մարզվում էին: Սակայն այս տարի Հայաստանի առաջնությունում գրանցված արդյունքների մեջ կա դրական տեղաշարժ»,-«Արմենպրես»-ի հետ զրույցում ասաց մարզիչը:
Նիկողոսյանի խոսքով` երիտասարդների պայքարում հուսադրող ապագա ունեցող մարզիկներ կան: Մարզիչը վստահ է, որ առաջիկայում Ուկրաինայում կայանալիք միջազգային մրցաշարում հայ հրաձիգները մեդալներ են նվաճելու:
Օդամղիչ հրացան 10 մետր 60 կրակոց տղաների պայքարում ոսկե մեդալակիր դարձավ Հրաչ Բաբայանը: Երկրորդ և երրորդ տեղերը համապատասխանաբար զբաղեցրել են Հայկ Բաբայանը և Վրեժ Թորոսյանը: Նույն վարժության կանանց պայքարում առաջինը Ալլա Պողոսյանն է: Նրան հաջորդում են Միլենա Պողոսյանը և Մարիամ Միքայելյանը:
Օդամղիչ ատրճանակ 10մ 60 կրակոց տղաների պայքարում Հայաստանի չեմպիոն դարձավ Բենիկ Խլղաթյանը: Արծաթե մեդալ նվաճեց Զավեն Իգիթյանը, իսկ բրոնզե` Նորայր Առաքելյանը: Կանանց վարժությունում լավագույն արդյունքները գրանցեցին Աննա Պողոսյանը, Էլմիրա Կարապետյանը և Քնքուշ Գասպարյանը:
Վազող թիրախ նորմալ վազք 10մ 30+30 կրակոց տղաների վարժությունում մրցանակային տեղերը համապատասխանաբար զբաղեցրեցին Հովհաննես Մարգարյանը, Տիգրան Մանուկյանը և Գոռ Խաչատրյանը: Իսկ կանանց պայքարում` Ժաննա Պողոսյանը, Գոհար Հարությունյանը և Արուսյան Գրիգորյանը:
Վազող թիրախ խառը վազք 10մ 2×20 կրակոց մրցաձևում Հայաստանի չեմպիոններ դարձան Հովհաննես Մարգարյանը և Լիլիթ Մկրտչյանը: Վերջինս սահմանեց ՀՀ մեծահասակների ռոկորդ: Հաղթող մարզիկները և առաջին տեղը գրաված մարզիկների անձնական մարզիչները ստացան դրամական պարգևներ:
