«Երևան-Մոսկվա թռիչքի տոմսը 385.000 դրամ է. մի կին թիվը լսել, վախից դուրս էր եկել». քաղաքացի
Մինչ կառավարության դիմաց բողոքի ակցիա և հացադուլ են իրականացնում Ռուսաստանի Դաշնություն մեկնել ցանկացող ՀՀ քաղաքացիները, որոնց համար Ռուսաստանը փակ է պահում ճանապարհը, Երևանում գտնվող «Աերոֆլոտ» ավիաընկերության գրասենյակի դիմաց հերթ են կանգնում ռուսական անձնագրեր ունեցողները և Ռուսաստանի Դաշնության քաղաքացիություն ունեցողների ընտանիքի անդամները, որպեսզի տոմս գնեն:
Ասում են՝ եթե նախկինում Երևան-Մոսկվա ուղղության տոմսը 70.000-100.000 դրամ էր, ապա այսօր 300.000 դրամից ավելի է: Քաղաքացիները չեն հասկանում, թե ո՞րն է թանկացման պատճառը և ի՞նչ կապ ունի տոմսի թանկացումը համավարակի հետ:
«Եթե 150.000 ռուբլիանոց տոմս ես առնում, կորոնավիրուս չես տանում հետդ, բայց, որ առնես 8000 կամ 10.000 ռուբլիանոց՝ կորոնավիրուս ես տանո՞ւմ: Այսինքն՝ սա բիզնես է, պետք է մի հատ ճշտեն, հասկանան, թե ինչ է կատարվում: Ասացին՝ սեպտեմբերի 12-ից հետո էլ չարտերային թռիչքներ չեն իրականացվում, այն ժամանակ գոնե այսքան թանկ չէր: Նոր մի կին դուրս եկավ, ասաց՝ Երևան-Մոսկվա ուղղությունը 385.000 դրամ էր, ստիպված թողեց ու հետ գնաց: Այդ թիվը լսել, վախից դուրս էր եկել»,- 168.am-ի հետ զրույցում ասացին գրասենյակի դիմաց հավաքված քաղաքացիները:
Նրացից մեկն էլ, որն այդ պահին դուրս եկավ ավիաընկերության գրասենյակից, հաստատեց, որ տոմսի արժեքը մոտ օրերի համար բավականին թանկ է, սակայն, եթե գնեն մոտավորապես 1 ամիս հետո մեկնելու համար՝ անհամեմատ մատչելի կլինի.
«Եթե մոտակա օրերին եք ուզում՝ թանկ է, հոկտեմբերի վերջի համար տոմս կար, որը էժան էր, բայց քանի որ ինձ չէր հետաքրքրում դա, չհարցրեցի ստույգ արժեքը: Ես վերցրել եմ հոկտեմբերի 1-ի համար Մոսկվա-Մագադան, 2 թռիչքը միասին վճարել եմ 300.000 դրամ»:
Քաղաքացիներից շատերն էլ, որ ունեն ռուսական անձնագրեր և չեն կարողանում հարյուր հազարավոր դրամներ վճարել տոմսի համար, մտավախություն ունեն, որ 1 ամիս հետո կրկին սահմանները կփակվեն, չեն կարողանա մեկնել.
«Ես զրուցել եմ ՀՀ-ում ՌԴ դեսպանության աշխատակցի հետ, հետո նոր եկել եմ այստեղ, ասում է՝ հերթով է, այս պահին միայն «Աերոֆլոտն»-ն է տոմսերը սպասարկում, բայց ինքը գարանտիա չունի՝ դու կթռնե՞ս, թե՞ չէ»:
168.am-ը փորձեց կապ հաստատել «Աերոֆլոտ» ավիաընկերության երևանյան գրասենյակի հետ՝ պարզելու համար, թե ինչո՞վ է պայմանավորված տոմսերի նման թանկացումը, սակայն մեր զանգերը մնացին անպատասխան:
