Վաղարշապատի ոստիկանները խուզարկությամբ թմրամիջոցներ են հայտնաբերել․ մեկ անձ ձերբակալվել է
Հարուցված քրեական գործի շրջանակներում ձեռնարկված օպերատիվ-հետախուզական միջոցառումների արդյունքում ոստիկանության Վաղարշապատի բաժնի ծառայողները ապօրինի թմրաշրջանառության վերաբերյալ տեղեկություններ ձեռք բերեցին։
Արդյունքում՝ հուլիսի 9-ին, դատարանի որոշմամբ, խուզարկվեց Էջմիածնի Կոմիտասի փողոցի տներից մեկը։ Իրավապահները հայտնաբերեցին մոտ 23 կիլոգրամ մշակված կանեփի բույս, նույն բույսի թաց զանգված՝ 240 գրամից ավելի քաշով, արմատախիլ արված կանեփի բույսեր, օգտագործված կաթուցիչ և այլն։ Հայտնաբերվածն առգրավվել է։
Նշանակվել է դատաքիմիական փորձաքննություն։ 30-ամյա տանտերը ձերբակալվել է։ Հանգամանքները նախաքննությամբ պարզվում են։
