Նախագահ Հարությունյանը դատախազության աշխատակազմին վաղը պաշտոնապես կներկայացնի նորընտիր գլխավոր դատախազին
Արցախի Հանրապետության Նախագահ Արայիկ Հարությունյանը վաղը դատախազության աշխատակազմին պաշտոնապես կներկայացնի Հանրապետության նորընտիր գլխավոր դատախազ Մհեր Աղաջանյանին:
Այս մասին ֆեյսբուքյան իր էջում գրել է ԱՀ Նախագահ Արայիկ Հարությունյանը:
Գրառումն ամբողջությամբ ներկայացնում ենք ստորև՝
«Հարգելի՛ հայրենակիցներ
Տեղյակ եք, որ օրեր առաջ Հանրապետության գլխավոր դատախազի պաշտոնի համար Ազգային ժողովի քննարկմանն եմ ներկայացրել Մհեր Աղաջանյանի թեկնածությունը: Այսօր տեղի ունեցած Խորհրդարանի արտահերթ նստաշրջանում փակ գաղտնի քվեարկության արդյունքում 30 կողմ, 3 դեմ ձայների հարաբերակցությամբ Մհեր Աղաջանյանն ընտրվել է ԱՀ գլխավոր դատախազ:
Շնորհակալություն եմ հայտնում ԱԺ բոլոր այն պատգամավորներին, ովքեր հավանություն են տվել իմ առաջարկին, իսկ ժողովրդի ընտրյալների կողմից այդչափ մեծ վստահության արժանանալը, կարծում եմ, պետք է միայն բարձրացնի Մհեր Աղաջանյանի պատասխանատվության աստիճանն աշխատանքում:
Դատախազության աշխատակազմին նրան պաշտոնապես կներկայացնեմ վաղը»:
