Խաղաղապահ զորախմբերից որևէ մեկում կորոնավիրուսով վարակման դեպք չկա, նույնիսկ` կոնտակտավոր. Արտակ Տոնոյան
ՀՀ զինված ուժերում շարունակվում են հակահամաճարակային խիստ միջոցառումներ ձեռնարկվել` կանխելու կորոնավիրուսի տարածումն ու ներթափանցումը: Ֆեյսբուքյան ուղիղ եթերում հերթական անգամ հավաստիացրեց ՀՀ ՊՆ մամուլի քարտուղար Շուշան Ստեփանյանը:
Նա տեղեկացրեց, որ կորոնավիրուսով վարակված հինգ զինծառայողներից 4-ը գտնվում են շատ լավ վիճակում. չունեն ջերմություն և ոչ մի ախտանշան: Իսկ մեկ զինծառայողի մոտ առկա է թույլ արտահայտված ջերմություն:
«Այսօր ուենք լավ լուրեր, այն է` չունենք նոր նմուշառումներ, նոր մեկուսացվածներ, իսկ մեկուսացվածների առողջական վիճակը գերազանց է, տրամադրությունը` բարձր»,- լրացրեց ՊՆ խոսնակը:
Իսկ թե աշխարհում ստեղծված համաճարակային դժվարին իրավիճակում տարբեր երկրներում ինչ պայմաններում են խաղաղապահ առաքելություն իրականացնում հայկական զորախմբերը, Շուշան Ստեփանյանը` ՀՀ պաշտպանության նախարարության խաղաղապահ ուժերի բրիգադի հրամանատար Արտակ Տոնոյանի հետ մեկտեղ, փորձեց պարզել ուղիղ տեսակապի միջոցով: Մինչ այդ հրամանատար Տոնոյանը վստահեցրեց, որ ամենօրյա կապի մեջ է հայկական զորախմբերի հետ և տեղեկացված է, որ կորոնավիրուսի տարածմամբ պայմանավորված` հայ խաղաղապահների առողջականի մասով խնդրահարույց հարցեր չկան, կատարվում են կանխարգելիչ բոլոր միջոցառումները:
«Նույնիսկ կոնտակտավոր, կամ այսպիսի անհանգստության առիթ դեռ չունենք»,- շեշտեց խաղաղապահ ուժերի բրիգադի հրամանատար Արտակ Տոնոյանը:
Այլ մանրամասներ տեսակապի միջոցով ներկայացրեցին արդեն խաղաղապահ զորախմբերի հրամանատարները:
Առաջինն ուղիղ տեսակապ հաստատվեց Աֆղանստանում հայկական խաղաղապահ զորախմբի հրամանատարի հետ:
Փոխգնդապետ Թադևոսյանը հայտնեց, որ հայ խաղաղապահներն իրենց առաքելությունն իրականացնում են Մազարի-Շարիֆ քաղաքից ոչ շատ հեռու տեղակայված ռազմաբազաներից մեկում, որի պաշտպանությունը վստահված է հենց իրենց:
«Ներկա պահին վիրուսի հետ կապված ոչ մի խանգարող, խոչընդոտող կամ մտահոգող խնդիրներ չունենք: Մեր հայկական զորախումբն իր ծառայությունն իրականացնում է բնականոն հունով: Այն կանխարգելիչ միջոցառումները, որոնք իրականացվել են, դրանք եղել են հետևյալը. կրճատվել են խաղաղ քաղաքացիական բնակչության մուտքն ու ելքը մեր ռազմաբազա, բաժանվել են սպիրտային լուծույթով տարաներ: Ընդ որում, փոքրիկ տարաները զինծառայողները պահում են իրենց գրպանում, իսկ մեծ տարաները տեղադրված են նրանց սենյակներում, ժամանցի սենյակներում, միջանցքներում և այլ տեղերում, որ զինծառայողները հաճախակի ախտահանեն իրենց ձեռքերը: Իսկ զինծառայողների ստուգման հետ կապված՝ ասեմ, որ ունենք բժշկուհի, որը հետևողականորեն հարցուփորձի միջոցով, կամ, եթե ինքն արտաքինից տարօրինակ երևույթ է նկատում, անմիջապես կազմակերպում է ջերմաչափում: Դեռևս նման խնդիրներ չունենք»,- հավաստիացրեց Աֆղանստանում հայկական խաղաղապահ զորախմբի հրամանատարը:
Տեսակապի երկրորդ կանգառը Կոսովոն էր: Կոսովոյում հայկական զորախմբի հրամանատարն ասաց, որ ծառայության վայրում կատարվում են կանխարգելիչ միջոցառումներ` ախտահանում ալկոգելով օրը 6-7 անգամ:
«Անձնակազմն այս պահին առողջ է լիովին: Այստեղ հրամանատարությունը բոլոր միջոցառումներն աշխատում է կատարել, որ վարակ չլինի: Իհարկե, մեկ հոգի վարակվել է. արձակուրդից վերադառնալուց հետո նրա մոտ հայտնաբերվել է կորոնավիրուս: Այդ անձը Բուլղարիայից է, որին մեկ օր հետո էվակուացրել են իրենց հանրապետություն: Մեզ հետ կապված խնդիր չունենք, բարոյահոգեպես կայուն ենք, խուճապի չենք մատնվում»,- ընդգծեց զորախմբի հրամանատարը:
Հաջորդը տեսակապ հաստատվեց ՄԱԿ-ի հովանու ներքո Լիբանանում գործող հայկական խաղաղապահ զորախմբի ներկայացուցչի հետ: Նա հայտնեց, որ ներկա պահին գտնվում են Լիբանանի ՅՈՒՆԻՖԻԼ խաղաղապահ առաքելության կենտրոնակայանի Շամա ռազմաբազայում, կա 32 զինծառայող:
«Կորոնավիրուսի հետ կապված ոչ մի տեսակի խնդիրներ չունենք, պահպանվում են հիգիենայի բոլոր կանոնները: Իտալացիների կողմից անցկացվել են դասընթացներ` ինչից զերծ մնանք: Ներկա պահին անձնակազմը գտնվում է հսկիչ-անցագրային կետում, որտեղ ծառայությունը կատարվում է դիմաշնչակներով և ձեռնոցներով: Պահպանվում է բոլոր տեսակի անվտանգությունը, անձնակազմն ապահովված է ձեռնոցներով, սպիրտով, դիմակներով: Անձնակազմի բարոյահոգեբանական վիճակը կայուն է, օրը 2 անգամ ջերմաչափում է կատարվում էլեկտրոնային ջերմաչափով: Ոչ մի տեսակի խնդիր չունենք, ծառայությունն ընթանում է նորմալ»,- մանրամասնեց Լիբանանում հայկական զորախմբի ներկայացուցիչը:
Չանտեսվեց նաև Հալեպում հումանիտար առաքելություն իրականացնող խմբի համաճարակային վիճակը: Խմբի անդամներից Բասենցյանը նշեց, որ համավարակից խուսափելու համար քլորակիր լուծույթով կատարվում են շրջակա միջավայրի, տեխնիկայի ախտահանիչ գործողություններ, նույնիսկ սենյակներն են ախտահանվել:
«Անձնակազմը նորմալ վիճակում է, հիվանդներ չունենք այս պահի դրությամբ: Ականազերծման աշխատանքներն էլ ամբողջությամբ ընթանում են»,- ամփոփեց նա:
ՄԱԿ-ի հովանու ներքո Լիբանանում, ինչպես նաև` ՆԱՏՕ-ի՝ «Համագործակցություն հանուն խաղաղության» ծրագրով Կոսովոյում, Աֆղանստանում խաղաղապահ առաքելություններ իրականացնող մեր զորախմբերի զինծառայողներն առողջ են, կատարում են իրենց առջեւ դրված խնդիրները։
Gepostet von Shushan Stepanyan am Samstag, 28. März 2020
Հիշեցնենք, որ օրեր առաջ 168.am-ն անդրադարձել էր և’ տարբեր երկրներում գտնվող մեր խաղաղապահների, և’ Սիրիայում հումանիտար առաքելություն իրականացնող հայկական խմբի համաճարակային անվտանգության խնդիրներին: Մասնավորապես, մեզ հետ զրույցում ՀՀ ՊՆ խոսնակը նշել էր.
«ՀՀ զինված ուժերի խաղաղապահ բրիգադն իրականացնում է միջազգային խաղաղարար առաքելություններ՝ ՄԱԿ մեկ սպա՝ Մալիում, ինչպես նաև` ՆԱՏՕ-ի՝ «Համագործակցություն հանուն խաղաղության» ծրագրով Կոսովոյում, Աֆղանստանում: Պաշտպանության նախարարությունը մշտական կապի մեջ է խաղաղապահների հետ, զորախմբի բոլոր զինծառայողների առողջական վիճակը գնահատվում է լավ, և նրանք անխափան իրականացնում են խաղաղարար առաքելությունը։ Միաժամանակ, ըստ միջազգային չափանիշերի՝ իրականացվում են նախատեսված հակահամաճարակային բոլոր միջոցառումները»։
Իսկ Հումանիտար ականազերծման և փորձագիտական կենտրոնի հասարակայնության հետ կապերի մասնագետ Կարինե Հախնազարյանն էլ վստահեցրել էր, որ Հալեպում հումանիտար առաքելություն իրականացնող մեր խումբը բնականոն հունով շարունակում է իր աշխատանքները, կիրառվում են պաշտպանիչ բոլոր միջոցները:
«Մենք ականազերծում ենք տարածքներ, որտեղ մարդկանց մուտքն արգելված է, ինչն ապահովում է մեր ականազերծողների անվտանգությունը՝ համավարակից խուսափելու համար: Փորձառու բժիշկներից կազմված մեր խումբը պահպանում է անվտանգության բոլոր կանոնները՝ կիրառում պաշտպանիչ բոլոր միջոցները»,- հավելել էր նա:
