Լիբիական բանակը զենքով բեռնված թուրքական նավ է ոչնչացրել Տրիպոլիի նավահանգստում. Al-Arabiya
Լիբիական ազգային բանակի ներկայացուցիչ Հալիդ ալ Մահջուբը հայտարարել է Տրիպոլիի նավահանգստում թուրքական նավի ոչնչացման մասին: Այդ մասին փետրվարի 18-ին հայտնել է Al-Arabiya հեռուստաալիքը:
Հայտարարության համաձայն, նավը «տեղափոխում էր զենք ու զինամթերք, որը նախատեսված էր զինված խմբավորումների համար»: Ալ-Մահջուբի խոսքով՝ զենքով բեռնված նավը ժամանել էր Թուրքիայից, ինչը միջազգային պայմանավորվածությունների խախտում է, որոնք արգելում են զենքի մատակարարումները Լիբիային: Փետրվարի 18-ին ավելի վաղ Al-Wasat լիբիական տեղեկատվական պորտալը հայտնել էր գնդակոծման մասին, որին ենթարկվել է Տրիպոլիի գլխավոր ծովային նավահանգիստը: Պորտալի տվյալներով, մի քանի արկ է պայթել նավահանգստի տարածքում:
Լիբիայում ՄԱԿ-ի գլխավոր քարտուղարի հատուկ ներկայացուցիչ Հասան Սալամեն հաստատել է Տրիպոլիի նավահանգստի գնդակոծման փաստը՝ ընդսմին հայտարարելով զենքի մատակարարման բռնարգելքի խախտումների, ինչպես նաեւ Լիբիա օտարերկրյա զինյալների փոխադրման փաստերի մասին, հաղորդել է ՏԱՍՍ-ը:
