Հենց օդանավակայանում ԱԱԾ աշխատակիցները մոտեցել են Գագիկ Խաչատրյանի որդուն և տարել իրենց հետ. «Հրապարակ»
«Հրապարակ» թերթը գրում է. «Մեզ տեղեկացրել էին, որ մեղադրանք է առաջադրվել նաեւ ՊԵԿ նախկին նախագահ, այժմ կալանքի տակ գտնվող Գագիկ Խաչատրյանի որդուն՝ Գուրգեն Խաչատրյանին։ Հենց օդանավակայանում՝ Երեւան ժամանելուն պես, նրան են մոտեցել ԱԱԾ աշխատակիցները եւ տարել իրենց հետ։ Մեր տեղեկություններով, նրան մեղադրանք է առաջադրվել եւ ստորագրությամբ ազատ արձակվել։
Մեր աղբյուրը նշում է, որ նրան մեղադրում են փողերի լվացման մեջ, սակայն գործը նոր չի հարուցվել եւ առնչություն չունի նրա հոր գործի հետ։ Իսկ գործը գաղտնի են պահել, որ Գուրգեն Խաչատրյանը վերադառնա Հայաստան։ Մենք կապվեցինք Գուրգեն Խաչատրյանի հետ։ Նա բոլորովին չզարմացավ մեր հարցից, սակայն հերքեց՝ ասելով, թե իր նկատմամբ հարուցված ոչ մի գործ չկա։ ԱԱԾ-ից մեզ պատասխանեցին․ «Նախաքննական գաղտնիքից ելնելով՝ ոչինչ չենք հրապարակում»։
