«Ցավոք սրտի, մենք ունեցանք մեկ զոհ և երեք վիրավոր, և կարող եմ ասել, որ համարժեք պատասխան տրված է». Արտակ Դավթյան
Հայաստանի սահմանին իրավիճակը, ընդհանուր առմամբ, կայուն է, վերահսկելի, թեև որոշ լարվածություն եղել է այս ընթացքում: Այս մասին լրագրողների հետ հանդիպմանն ասաց ՀՀ ԶՈւ ԳՇ պետ, գեներալ-լեյտենանտ Արտակ Դավթյանը՝ տեղեկացնելով, որ ասուլիսից կես ժամ առաջ Տավուշում կրակոցներ են եղել ադրբեջանական կողմից, որոնք դադարեցվել են հայկական կողմի պատասխան կրակի արդյունքում:
«Իհարկե, համեմատության կարգով պետք է ասեմ, որ կրակոցների, միջադեպերի թվերը որոշակի չափով նվազել են»,- նշեց Դավթյանը:
ՀՀ ԶՈՒ ԳՇ պետը վստահեցրեց, որ Տավուշում ադրբեջանական կողմի գործողություններին, որի հետևանքով ունեցել ենք նաև զոհ, համարժեք պատասխան է տրվել: «Ցավոք սրտի, մենք ունեցանք մեկ զոհ և երեք վիրավոր, և կարող եմ ասել, որ համարժեք պատասխան տրված է»,- ասաց նա:
Մարիամ Պետրոսյան
