Հայաստանում առկա է հեպատիտ Ց-ի ավելի քան 4500 դեպք. սուր և քրոնիկ հեպատիտ Բ-ն ու Ց-ն նահանջել են
Թեև Հայաստանում սուր և քրոնիկ հեպատիտ Ց-ով և Բ-ով հիվանդացության նվազում է դիտվում, 2019-ի առաջին կիսամյակում հեպատիտ Ց է ախտորոշվել 706 պացիենտի շրջանում, ովքեր բուժհաստատություն են դիմել այլ խնդիրներով: Հեպատիտի դեմ պայքարի համաշխարհային օրվան՝ հուլիսի 28-ին ընդառաջ հրավիրված ասուլիսում հայտնեց «Հիվանդությունների վերահսկման և կանխարգելման ազգային կենտրոն»-ի Ոչ վարակիչ հիվանդությունների ներհիվանդանոցային վարակների համաճարակաբանության բաժնի պետ Ռոմելլա Աբովյանը:
«2018-ին արձանագրվել է հեպատիտի 2070 նոր դեպք: Պատվաստումները, կանխարգելիչ շատ միջոցառումներ բերել են նրան, որ մենք ունենք սուր և քրոնիկ հեպատիտ Բ-ի՝1.2 անգամ և Ց-ի՝ 1.5 անգամ նվազում: 2018-ին հայտնաբերվել է սուր վիրուսային հեպատիտ Ց-ի 15 դեպք, առաջնային քրոնիկ հեպատիտ Ց-ի՝ 122 դեպք, և 1214 հեպատիտ Ց-ով հիվանդներ են ախտորոշվել, որոնք դիմել են բուժհիմնարկ լրիվ այլ խնդիրներով, հայտնաբերվել են արագ թեստով: Սա բավականին մեծ ցուցանիշ է»,- ընդգծեց Աբովյանն ու նշեց, որ արդեն այս տարվա առաջին կիսամյակում ունենք 706 պացիենտ, ովքեր ախտորոշվել են բուժհիմնարկում, երբ դիմել են այլ խնդիրներով:
Տվյալները ստացվում են ներդրված համաճարականաբանական հսկողության համակարգի շրջանակներում, սակայն Աբովյանը նկատեց՝ պետք է հաշվի առնել, որ բնակչության 80 տոկոսը տեղեկացված չէ հիվանդության մասին: Եվ ցուցանիշներն արտացոլում են պատկերն այնքանով, որքանով մարդիկ որևէ կերպ դիմել են բուժհիմնարկ և ախտորոշվել:
Հանրապետությունում հեպատիտ Ց-ով շուրջ 4500-ից ավելի դեպքեր կան, սակայն թվերն ամեն օր լրացվում են: Աբովյանի խոսքով՝ երբ ռիսկի խմբերում հետազոտություն են անում, կտրուկ ավելացում են արձանագրում:
Հեպատիտի փոխանցման ուղիներն են սեռական ճանապարհը, բժշկական միջամտությունները: Աբովյանը նշեց՝ բժշկական միջամտությունների մեջ մեծ դեր են խաղում կոսմետոլոգիական բժշկական միջամտությունները: «Եվ կոսմետոլոգիական կենտրոնների համար արդեն հաստատված են հստակ պահանջներ իրենց մոտ կիրառվող բժշկական իրերի մանրէազերծման, ախտահանման վերաբերյալ, որոնք մշակվել են միջազգային ստանդարտներին համապատասխան»,-ասաց նա:
Սակայն, որոշ մարդիկ մատնահարդարման ծառայություններ մատուցում են նաև տանը: Այս դեպքում նախարարությունը որևէ վերահսկողություն չի կարող իրականացնել: Սակայն այս առումով փորձում են լայնածավալ իրազեկման աշխատանքներ կատարել:
ՀՀ ԱՆ Հիվանդությունների վերահսկման և կանխարգելման ազգային կենտրոնի գլխավոր տնօրենի խորհրդական, Իմունականխարգելման ազգային ծրագրի ղեկավար Գայանե Սահակյանը նշեց, որ Հայաստանում 1999-ից օգտագործվում է հեպատիտ Բ-ի դեմ պատվաստանյութ: Դա զգալիորեն բարելավել է ցուցանիշները: Սակայն հեպատիտ Ց-ի դեմ պատվաստանյութ, ցավոք, դեռ չկա: Սահակյանը նկատեց, որ պատվաստանյութերի ներդրումից հետո նվազել է նաև հեպատիտ Ա-ով հիվանդացության ցուցանիշը:
Առողջապահության համաշխարհային կազմակերպության տվյալներով՝ 325 մլն մարդ աշխարհում ապրում է հեպատիտ Բ-ով և Ց-ով : Տարեկան 6 մլրդ դոլար ներդրում է անհրաժեշտ մինչև 2030 թվականը հեպատիտների վերացման նպատակին հասնելու համար: ԱՀԿ հայաստանյան գրասենյակի ներկայացուցիչ Եգոր Զայցևը նկատեց, որ հեպատիտ Բ-ի դեմ արդյունավետ պատվաստանյութ կա, որը Հայաստանն օգտագործում է 1999-ից: «Եվ 20 տարեկանից փոքրերը երջանիկ են, քանի ապահովված են: Իսկ ավելի մեծերը, անհրաժեշտության դեպքում, պետք է ստուգում անցնեն»,- ասաց նա ու նկատեց, որ աշխարհում ընդամենը 20 տոկոսից քիչ մարդիկ գիտեն իրենց կարգավիճակի, հիվանդության մասին: Նա հավելեց, որ Հայաստանում լուրջ քայլեր արդեն արվում են, պատրաստ է ծրագիր: Հայաստանում քաղաքական կամքը կա, և իրենք դա զգում են և աջակցում Հայաստանի ջանքերին:
Այս տարվա Հեպատիտի դեմ համաշխարհային օրվա կարգախոսն է «Կատարենք ներդրումներ հեպատիտների վերացման համար»:
