Ինչպե՞ս որոշել, թե որ հորմոնը չի բավականացնում օրգանիզմում
Ինչպե՞ս որոշել, թե որ հորմոնը չի բավականացնում օրգանիզմում։ Ամենաճշգրիտ պատասխանը կարելի է տալ՝ արյունը հետազոտության հանձնելով հորմոնները ստուգելու համար, որի արդյունքները ձեզ կարող են հուշել, թե որ հորմոնի դեֆիցիտն է զգում ձեր օրգանիզմը տվյալ պահին։
Շատ հաճախ, չնայած գործադրած ջանքերին, դժվար է լինում ազատվել ատելի ավելորդ կիլոգրամներից։ Բանն այն է, որ բավական չէ միայն վերանայել սեփական սննդակարգը, այն պետք է հարմարեցնել հորմոնալ տիպին։ Այդ ժամանակ ոչ միայն քաշի ցուցանիշը մեռյալ կետից կշարժվի, այլև հորմոնալ ֆոնի կարգավորումը բարերար ազդեցություն կունենա օրգանիզմի վրա ընդհանուր առմամբ, ինչը կհանգեցնի հավասարակշռության ու հոգեկան հանգստության։
Ո՞ր հորմոնն է պակասում օրգանիզմում
Գոյություն ունեն 4 կարևոր հորմոններ՝ ադրենալին, սերոտոնին, խոլին ու թիրոքսին։ Սովորական կանոնավոր կյանքում դրանց դիսբալանսը գործնականորեն չի նկատվում։ Բայց սթրեսների արդյունքում, որոնց ենթարկվում է ժամանակակից մարդը, այն ակնհայտ է դառնում, փոխվում է սննդային վարքագիծը։ Մեզնից մեկը սկսում է նյարդայնացած կլանել այն ամենը, ինչ ընկնում է ձեռքի տակ, իսկ մյուսի կոկորդով էլ պատառը կուլ չի գնում։
Կյանքի այդպիսի պահերին անհրաժեշտ է փոխել սննդակարգը՝ շեշտը դնելով հենց ձեր հորմոնալ տիպին հարմար մթերքների վրա։ Այդ ժամանակ կարելի է վերադարձնել կորցրած հավասարակշռությունը ու, միևնույն ժամանակ, լրացնել պակասող հորմոնի դեֆիցիտը՝ դրանով իսկ խուսափելով քաշի տատանումներից։
Ինչպե՞ս որոշել հորմոնալ տիպը
1-ին տիպ՝ ադրենալին։
Տարբերող առանձնահատկությունները՝
- Որպես կանոն՝ այս տիպը բնորոշ է բուերին, ովքեր առավոտյան չեն կարողանում արթնանալ առանց մի գավաթ առույգացնող բուրավետ սուրճի։
- Հուզմունքի և սթրեսի պահերին դուք անընդհատ ինչ-որ բան ծամելու կարիք եք ունենում, ընդ որում, հաճախ աղի սնունդը գերադասում եք քաղցրից։
- Ձեզ մոտ նկատվում է բարձր քրտնարտադրություն։
- Ձեզ համար դժվար է այդպիսի պահերին կենտրոնանալ։
Եթե այս տիպաժի նկարագրության մեջ դուք ձեզ ճանաչեցիք, ուրեմն ձեզ չի հերիքում ադրենալինը։
Ի՞նչ անել։
- Դուք պետք է հրաժարվեք ալկոհոլից, պանրից, ինչպես նաև քացախով պատրաստված կերակրատեսակներից, քանի որ վերջիններիս մեջ պարունակվում է հիստամին, որը սադրում է բորբոքային պրոցեսներ։ Իսկ ադրենալինի հավասարակշռությունը և մակարդակը վերականգնել կօգնի թիրոզին ամինաթթուն։
- Առավոտյան սուրճը ցանկալի է փոխարինել կանաչ թեյով. այն պակաս չի առույգացնում։
- Եթե առավոտյան ախորժակ չունեք, այնուամենայնիվ, չարժե բաց թողնել նախաճաշը, որպեսզի չդանդաղեցնեք նյութափոխանակությունը։ Գոնե մեկ բաժակ մածուն ուտել պետք է։
- Ցերեկը դուք կարող եք սնվել սովորականի պես, ձեր ճաշը պետք է բաղկացած լինի առնվազն 3 ճաշատեսակներից՝ 1-ին՝ ապուր, 2-րդ՝ ձկան կամ մսի կտոր խավարտով, 3-րդ՝ բանջարեղենային աղցան։
- Իսկ ահա ընթրիքը պետք է սպիտակուցային սնունդ պարունակի՝ ձուկ կամ միս։
- Թիրոզինի լավ աղբյուրներ են գետնանուշը և լոբեղենը։
2-րդ տիպ՝ խոլին։
Տարբերող առանձնահատկությունները՝
- Դուք միշտ ձեզ մոտ պահում եք կատարելիք գործերի ցուցակը, այլապես ինչ-որ բան կմոռանաք ու բաց կթողնեք։
- Ձեզ հեշտ է հանել հավասարակշռությունից, և անգամ փոքր անհանգստությունները ձեզ մոտ նյարդային ու տագնապային վիճակ են հարուցում։
- Երբեմն դա ուղեկցվում է փորկապությամբ ու ականջների մեջ հնչող աղմուկով։
Եթե դուք պատկանում եք տվյալ տիպին, ապա դուք պետք է ձեր օրգանիզմի խոլինի պաշարները լրացնեք, որը պատասխանատու է տրամադրության ու հիշողության համար։
Ի՞նչ անել։
Ձեր օրը սկսեք ճիշտ նախաճաշից։ Լավ կլինի, եթե դա լինի ձվածեղ կամ եփած ձու։ Բանն այն է, որ ձուն մթերք է, որը շատ խոլին է պարունակում։ Դրա համար էլ ճիշտ նախաճաշ ուտելով՝ դուք ոչ միայն կկարգավորեք մարսողությունը, այլև ձեր ուղեղը կնախապատրաստեք առաջիկա աշխատանքային խնդիրների լուծմանը։
Ձեզ մոտ միշտ մի բուռ դդմի սերմ ունեցեք։ Դրանք կօգնեն հաղթահարել վերահաս տագնապի զգացումը, կազատեն ներքին դիսկոմֆորտից։
Ճաշին և ընթրիքին ձեզ համար օգտակար է ուտել ձուկ և լոբազգիներ պարունակող կերակրատեսակներ, իսկ երեկոյան օգտակար է խմել անանուխով հանգստացնող թեյ։
3-րդ տիպ՝ սերոտոնին։
Տարբերակիչ առանձնահատկությունները՝
- Սթրեսի վիճակում դուք կարող եք բաց թողնել նախաճաշն ու ճաշն ու միայն երեկոյան հիշել, որ ոչինչ չեք կերել ողջ աշխատանքային օրվա ընթացքում։
- Երեկոյան լիքը ստամոքսի պատճառով դուք երկար ժամանակ չեք կարողանում քնել։
- Ձեզ հաճախ է տանջում անքնությունը, շարունակ տանջում է տագնապի զգացողությունը։
Եթե դուք վերոգրյալի մեջ ճանաչեցիք ձեզ, և ուզում եք հասկանալ, թե որ հորմոնը օրգանիզմին չի հերիքում, մեր պատասխանն է՝ սերոտոնին։
Ի՞նչ անել։
Տրիպտոֆան ամինաթթուն «երջանկության հորմոն» սերոտոնինի և «հանգստության հորմոն» մելանինի հիմնական շինանյութն է։
- Շատ օգտակար է օրը սկսել մի ափսե շիլայից ու մրգերից։
- Իսկ օրվա ընթացքում կարելի է ընկույզ ուտել։
- Ճաշին չմոռանաք, բացի հիմնական կերակրատեսակներից, ուտել մի ափսե բանջարեղենային աղցան, որը համեմված կլինի ձիթապտղի յուղով ու արևածաղկի սերմերով։ Նրանք հարուստ են օմեգա-3 ճարպաթթուներով։
- Շաբաթական գոնե մեկ անգամ ձեր սննդակարգի մեջ ներառեք ձկների ճարպոտ տեսակներ՝ սաղմոն, իշխան, սարդիններ։ Հատկապես օգտակար է ուտել թունա տեսակի ձուկ։ Այդ ձկան մեջ ավելի շատ տրիպտոֆան կա։
4-րդ տեսակ՝ թիրոքսին։
Տարբերակիչ առանձնահատկությունները՝
- Դուք սկսել եք նկատել, որ թափվում են ձեր մազերը կամ նրանց ծայրերը ճյուղավորվում են, մաշկն էլ հակված է չորության։
- Դրան ավելացրած՝ դուք հաճախ եք ունենում մարսողության հետ կապված խնդիրներ, կծկումները պարբերական չեն լինում։
- Լինում է, որ այտուցվում են ոտքերը՝ օրգանիզմում հեղուկի կանգի պատճառով։
- Դուք արագ եք հոգնում, անընդհատ սառչում եք։
Սրանք օրգանիզմում թիրոքսինի՝ վահանաձև գեղձի կարևոր հորմոնի անբավարարության նշաններ են, որը պատասխանատու է օրգանիզմում նյութափոխանակության համար։
Ի՞նչ անել։
- Դուք պետք է շատ ուտեք այնպիսի մթերքներ, որոնցում կա թիրոզին ամինաթթու, ինչպես նաև՝ ցինկ, յոդ ու սելենիում։
Այս նյութերով հարուստ են բոլոր սպիտակուցային մթերքները, դրա համար էլ սննդի յուրաքանչյուր ընդունման ժամանակ դրանք ձեր սեղանին անպայման պետք է ներկա լինեն։
- Ձեզ համար կատարյալ նախաճաշ կլինի կաթնաշոռի մի չափաբաժին՝ սեզոնային մրգերով։
- Ճաշին լավ կլինի ուտել ոսպով տաք աղցան, իսկ ընթրիքին՝ անյուղ ձուկ կամ միս։
Նշենք նաև, որ սերոտոնին մեծ քանակությամբ պարունակվում է ընկույզի և նուշի մեջ, իսկ յոդ՝ ծովամթերքի մեջ։ Ցինկ պարունակվում է տավարի, ոչխարի, հորթի մսի մեջ, ոստրեների, ծովախեցգետնի, շոկոլադի, գետնանուշի մեջ։
Բացի հավասարակշռված սննդից՝ հորմոնները զսպել ձեզ կօգնի ֆիզկուլտուրան ու սպորտը։ Չէ՞ որ հենց շարժումն է նպաստում սթրեսն ու լարվածությունը թոթափելուն ու բարձրացնում տրամադրությունը։ Մարզումների համար ընտրեք սիրելի մարզաձև։ Միայն այդ դեպքում դուք հաճույքով կմարզվեք ու կգրանցեք լավագույն արդյունքը։
Նյութը հրապարակման պատրաստեց Սոֆա Պետրոսյանը
