«Ա՛յ սրանում ես Կարեն Կարապետյանին ուզում եմ աջակցել». Կոնստանտին Զատուլին
«Մենք չենք ասում, որ Կարեն Կարապետյանին լիովին աջակցում ենք և ուզում ենք, որ նա դառնա վարչապետ։ Դա մենք չենք որոշում։ Նրանից, թե ինչ ենք մենք ուզում կամ չենք ուզում, տվյալ դեպքում քիչ բան է փոխվում»,- այսօր ասուլիսի ժամանակ հայտարարեց ՌԴ Դաշնային ժողովի Պետական դումայի ԱՊՀ գործերով եվրասիական ինտեգրման ու հայրենակիցների հետ կապերի կոմիտեի նախագահի առաջին տեղակալ Կոնստանտին Զատուլինը։
Նա պարզաբանեց, որ Կարապետյանին աջակցում են՝ որպես գործող իշխանության ղեկավարի, որը պարտավոր է ապահովել կարգուկանոն, անվտանգություն և այլն. «Ա՛յ սրանում ես նրան ուզում եմ աջակցել։ Եվ եթե որևէ այլ մարդ լիներ Կարապետյանի փոխարեն, ես նույն կերպ նրան կաջակցեի»։
Կ.Զատուլինի խոսքով՝ Երևանում ցույցերի պատճառով ՌԴ դեսպանատան աշխատակիցների երեխաները 3 ժամ ավտոբուսի մեջ էին մնացել, և մի կողմի իրավունքների իրացումը չպետք է խախտի մյուս մարդկանց իրավունքները։ Ամեն դեպքում, ինչպես նկատեց Զատուլինը, ցույցերի վերաբերյալ ՀՀ-ում ՌԴ դեսպան Վոլինկինի արձագանքը եղել է հետևյալը. «Ոտքով քայլելն օգտակար է»։
