ՄԱԿ-ը հունիսին կանցկացնի հակաահաբեկչական ծառայությունների ղեկավարների առաջին խորհրդաժողովը
ՄԱԿ-ը հունիսին կանցկացնի մասնակից երկրների հակաահաբեկչական ծառայությունների ղեկավարների առաջին խորհրդաժողովը, որի նպատակը կդառնա բազմակողմ կոոպերացման ամրապնդումը ահաբեկչության դեմ մղվող պայքարում: Այդ մասին, ինչպես հաղորդել է ՏԱՍՍ-ը, հայտարարել է ՄԱԿ-ի գլխավոր քարտուղար Անտոնիու Գուտերիշը անվտանգության հարցերը տնօրինող բարձրաստիճան ներկայացուցիչների միջազգային հանդիպման մասնակիցներին հղած ուղերձում, որն ապրիլի 25-ին բացվել է Սոչիում:
Գլխավոր քարտուղարի ուղերձը հրապարակել է նրա տեղակալ Յուրի Ֆեդոտովը։ «Հունիսին ես կհրավիրեմ ՄԱԿ-ի առաջին խորհրդաժողովը մասնակից երկրների հակաահաբեկչական ծառայությունների ղեկավարների համար,-նշել է Գուտերիշը:-Նրա նպատակը կդառնա բազմակողմ հակաահաբեկչական համագործակցության ուժեղացումը նոր համաշխարհային, տարածաշրջանային ու երկկողմ ձեւաչափերի օգնությամբ»:
ՄԱԿ-ի գլխավոր քարտուղարը նշել է, որ ահաբեկչության եւ ծայրահեղականության դեմ պայքարում միջազգային համագործակցությունն այսօր «կարեւոր է, ինչպես երբեք»: Նրա խոսքով՝ անհրաժեշտ է ակտիվացնել հակամարտությունների կանխման ջանքերը:
«Մեզ հարկավոր է միասին կենտրոնանալ հակամարտությունից երկխոսության անցնելու վրա, որը հենվում է իրավունքի նորմերի եւ վեճերի խաղաղ լուծման հանձնառության վրա»,-հայտարարել է գլխավոր քարտուղարը:
