«Գազպրոմ Արմենիա»-ն պատրաստվում է առաջիկա 3 տարիներին կատարել 28 միլիարդ դրամի ներդրում
«Գազպրոմ Արմենիա» ընկերությունը նախատեսում է 2018-2020-ին կատարել ավելի քան 28 միլիարդ դրամի ներդրում: Այն ամրագրված է ՀՀ հանրային ծառայությունները կարգավորող հանձնաժողով ընկերության ներկայացրած 2018-2020 թթ. ներդրումային ծրագրում: Ներդրումները կուղղվեն մայրուղային նոր գազատարների կառուցմանը, ժամանակակից տեխնիկայի և տեխնոլոգիաների ներդրմանը, ավտոտրանսպորտային միջոցների և մեխանիզմների, հողատարածքների, շենքերի, շինությունների և այլ անշարժ գույքի ձեռքբերմանը, Աբովյանի գազի ստորգետնյա պահեստարան կայանի (ԳՍՊԿ)-ի ընդլայնմանը:
2018-ին նախատեսվում է 2.9, 2019-ին` 3.1, 2020-ին` 22.1 միլիարդ դրամի ներդրում, որից մայրուղային նոր գազատարների կառուցմանը 2018-ին կուղղվի 2.5, 2019-ին` 1.8, 2020-ին` 3.3 միլիարդ դրամ: Իսկ ամենախոշոր ներդրումն ընկերությունը կկատարվի 2020 թվականին Աբովյանի ԳՍՊԿ-ի ընդլայնման ուղղությամբ` մոտ 18.7 միլիարդ դրամի չափով:
ՀԾԿՀ մամուլի քարտուղար Մարիամ Ստեփանյանը տեղեկացրեց, որ ընկերության ներկայացրած ներդրումային ծրագիրն այժմ քննարկման փուլում է և առաջիկա շաբաթվա ընթացքում կհստակեցվի նիստի օրը, որի ժամանակ այն կդրվի հաստատման: «Եթե ոչ եկող չորեքշաբթի, ապա դրան հաջորդող չորեքշաբթի օրն այն կմտնի հանձնաժողովի նիստի օրակարգ»,-ասաց Մարիամ Ստեփանյանը: Նա չբացառեց, որ քննարկման արդյունքում հնարավոր են վերանայումներ ծախսային մասով:
