Նոտարների գործը շատացել է

Ըստ ՀՀ արդարադատության նախարարության ամփոփ տեղեկատվության, 2017թ. II եռամսյակում համակարգում վավերացվել է 148 070 գործ, գանձված պետական տուրքը կազմել է 152.7 մլն. դրամ: Մեկ գործարքի հաշվով գանձված պետական տուրքը կազմել է 1.03 հազ. դրամ:

2016 թվականի նույն եռամսյակի համեմատ ավելացել է ինչպես վավերացված գործերի քանակը, այնպես էլ գանձված պետտուրքը։ Այսպես, վավերացված գործերի քանակն ավելացել է 20 571-ով (2016-ի երկրորդ եռամսյակում վավերացվել էր 127 499 գործ), իսկ գանձված պետական տուրքը ավելացել է 20.8 մլն դրամով (2016-ի երկրորդ եռամսյակում գանձվել էր 131.9 մլն դրամ)։

Ըստ գործերի տեսակի՝ ամենաշատը նոտարի վստահված թարգմանչի ստորագրության իսկության վավերացման գործերն են՝ 45.5 հազար գործ։

Երկրորդ տեղում փաստաթղթերի վրա եղած ստորագրությունների իսկության վավերացումներն են՝ 25.3 հազար գործ, երրորդում՝ լիազորագրերի վավերացումները՝ 18.6 հազար։

Ամենաշատ պետական տուրքը՝ 30.4 մլն դրամ գանձվել է անշարժ գույքի օտարման պայմանագրերի վավերացման գործերով։