Թեհրանը միջոցառումներ է պատրաստել ի պատասխան ԱՄՆ-ի պատժամիջոցների
Իրանը 16 միջոցառումներից բաղկացած ցուցակ է պատրաստել ի պատասխան Թեհրանի դեմ ԱՄՆ-ի պատժամիջոցների խստացման: Այդ մասին հայտնել էայդ երկրի արտաքին գործերի փոխնախարար Աբաս Արաքչին:
Ելույթ ունենալով պետական հեռուստատեսությամբ, նա չի կոնկրետացրել՝ ինչ քայլեր է մտադիր ձեռնարկել իրանի ղեկավարությունը, սակայն նշել է, որ դրանցից մի քանիսը կվերաբերեն երկրի զինված ուժերի կատարելագործմանը: Նա նաեւ հայտարարել Է, որ պատժամիջոցների սահմանմամբ «խախտվել էմիջուկային գործարքը»:
Ավելի վաղ Իրանի խորհրդարանի խոսնակ Ալի Լարիջանին նույնպես հայտարարել է, որ ԱՄՆ-ն իր պատժամիջոցներով խախտել է իրանական միջուկային ծրագրի վերաբերյալ համաձայնագրի պայմանները, եւ Թեհրանն այդ գործողությունները գանգատարկել է ՄԱԿ-ի Անվտանգության խորհրդում:
ԱՄՆ-ը 18 կազմակերպություններ ու ֆիզիկական անձանց ներառել է Իրանի հրթիռային ծրագրի հետ կապված պատժամիջոցների ցուցակում: Թեհրանը դատապարտել է Վաշինգտոնի պատժամիջոցները, հայտնելով, որ պատասխան պատժամիջոցներ կսահմանի ամերիկացիների եւ ամերիկյան ընկերությունների նկատմամբ:
Ընդ որում ավելի վաղ ԱՄՆ-ը հաստատել է, որ Իրանը, իր կարծիքով, կատարում է Միջուկային ծրագրի վերաբերյալ գործողությունների համապարփակ պլանի պայմանները:
Իրանը եւ միջազգային բանակցորդների «վեցյակը» 2015 թվականի հուլիսի 14-ի գիշերը պատմական համաձայնության են հասել իրանական բազմամյա միջուկային հիմնախնդրի կարգավորման շուրջ:
Երկարատեւ բանակցություններն ավարտվել են գործողությունների համատեղ համապարփակ ծրագրի ընդունմամբ, որի կատարումը վերացնում է ավելի վաղ ՄԱԿ-ի ԱԽ-ի, ԱՄՆ-ի եւ Եվրամիության կողմից Իրանի նկատմամբ սահմանված տնտեսական ու ֆինանսական պատժամիջոցները: Պլանն ուժի մեջ է մտել 2016 թվականի հունվարի 16-ին, հաղորդել է «Ինտերֆաքս»-ը:
