«Մեր տղաները պայքարելու են մինչև սուլիչ: Մենք պատրաստ ենք թե՛ ֆիզիկապես, թե՛ հոգեպես». Աշոտ Բարսեղյան
Այսօր երեկոյան՝ Երևանի ժամանակով 20:00-ին, տեղի կունենա Եվրոպա լիգայի որակավորման 1-ին փուլի պատասխան հանդիպումը, որտեղ «Գանձասար-Կապանը» կընդունի Մոնտենեգրոյի «Մլադոստին»:
Առաջին խաղում հյուընկալվելիս հայկական թիմը պարտվել էր 1:0 հաշվով, իսկ մրցակիցը հաջողության էր հասել 11-մետրանոց հարվածի շնորհիվ:
Հայկական թիմն ունի հնարավորություն՝ դուրս գալ հաջորդ փուլ: Այսպես են մտածում երկու թիմերի մարզիչները, ովքեր խաղից առաջ խոսել են սպասվելիք խաղի մասին:
«Գանձասար-Կապանի» գլխավոր մարզիչ Աշոտ Բարսեղյանը նշում է, որ առաջին խաղում իրենք գրեթե ծանոթ չէին մրցակցին, քանի որ թիմն ուներ 7-8 նոր ֆուտբոլիստներ:
«Առաջին խաղակեսը լավ անցկացրինք, առավելություն ունեինք: 2-րդ խաղակեսում նշանակվեց 11-մետրանոց: Շատերը դա անհեթեթ են համարում:
Միանշանակ խաղացել ենք լավ, սակայն պետք է նշել, որ մրցակիցը շատ լավ պահեր ուներ»,- նշում է Աշոտ Բարսեղյանը:
Աշոտ Բասեղյանը նշում է, որ հաջորդ դուրս գալու շանսերը շատ մեծ են:
«Չնայած նրան, որ մրցակիցը կեղտոտ ֆուտբոլ է խաղում (խոսքը Մուսոնդային պարբերաբար հարվածելու մասին է.- Ս.Ա.) մեր ֆուտբոլիստն իրեն պահեց տղայի նման:
Եթե դրսում գոլ խփեինք, շանսերն ավելի մեծ կլինեին: Հիմա մենք պետք է գոլ խփենք, ինչպես նաև ուշադրություն դարձնենք պաշտպանությանը: Ոչինչ դեռ կորած չէ:
Մեր տղաները պայքարելու են մինչև սուլիչ: Մենք պատրաստ ենք թե՛ ֆիզիկապես, թե՛ հոգեպես»:
Աշոտ Բարսեղյանը նշում է, որ մրցավարը հասկացել է, որ սխալմամբ է 11-մետրանոց նշանակել: Ըստ հայկական թիմի գլխավոր մարզչի՝ մրցավարը բառացիորեն ներողություն չի խնդրել, սակայն ձեռքով ժեստ է արել, որից հասկացվել է, որ նա փոշմանել է:
Աշոտ Բարսեղյանը նշում է, որ թիմը փորձելու է հանգիստ գործել: Առաջնային նպատակը գոլ խփելն է, որը կարող է լինել թե՛ ամենասկզբում, թե՛ 80-րդ րոպեին:
Խոսելով այն մասին, որ հայկական թիմերից Եվրոպա լիգայում ամենամեծ շանսերն ունի «Գանձասար-Կապանը»՝ Աշոտ Բարսեղյանը նշում է, որ շատ են ցանկանում ուրախացնել ժողովրդին;
«Մեր ղեկավարությունը մեր կողքին է: Մենք ուզում ենք հաջողության հասնել և ուրախացնել բոլորին»:
Սիրարփի Աղաբաբյան
