Ուրարտական ճաշարան՝ «Էրեբունի» թանգարանի տարածքում
Էրեբունի պատմահնագիտական արգելոց-թանգարանի հնավայրի, սակայն ոչ միջնաբերդի տարածքում զբոսաշրջային բաղադրիչ մտցնելու համար նախատեսվում է ավտոկայանատեղի, հուշանվերների խանութներ, ինչպես նաև ուրարտական ճաշարան բացել։ Լրագրողների հետ զրույցում Էրեբունի պատմահնագիտական արգելոց-թանգարանի տնօրեն Գագիկ Գյուրջյանն ասաց, որ փորձում են միջազգային փորձի հիման վրա ստեղծել թանգարանների ժամանակակից մատուցում։
«Փորձում ենք համատեղ ներկայացնել ոչ նյութական և նյութական ժառանգությունները։ Եթե ստեղծում ենք ճաշարան, չի նշանակում, որ թանգարանի տարածքում ռեստորան է բացվելու»,- շեշտեց Գյուրջյանը։
Պեղումները փաստել են, որ ուրարտական ժամանակաշրջանի կերակուրներում օգտագործվել են գարի, սիսեռ, սալոր և այլ գյուղատնտեսական ապրանքներ:
Ճաշարանում ներկայացվելու են ուրարտական բաղադրատոմսով պատրաստված կերակրատեսակներ։ Այն կլինի ուրարտական վերստեղծված բնակելի տանը, մատուցողներն էլ համապատասխան տարազներով կլինեն։
