«Թիլերսոնը «գերազանց աշխատեց» Մոսկվայում». Թրամփ
ԱՄՆ-ի պետքարտուղար Ռեքս Թիլերսոնը «գերազանց աշխատանք» կատարեց Մոսկվայում, որտեղ առաջ մղեց «անվտանգության ոլորտում ԱՄՆ-ի եւ նրա դաշնակիցների շահերը» Ռուսաստանի իշխանությունների ներկայացուցիչների հետ կայացած հանդիպումներում: Այս մասին հայտարարել է ԱՄՆ-ի նախագահ Դոնալդ Թրամփը՝ ՆԱՏՕ-ի գլխավոր քարտուղար Ենս Ստոլտենբերգի հետ Սպիտակ տանը հրավիրված համատեղ մամուլի ասուլիսում:
Միացյալ Նահանգների ղեկավարի խոսքով՝ ԱՄՆ-ի պետքարտուղարը «շատ հաջող» հանդիպումներ է ունեցել Ռուսաստանի մայրաքաղաքում:
Նախագահը նաեւ նշել է, որ Մոսկվայում պետքարտուղարի բանակցությունները, հնարավոր է, անցան ավելի լավ, քան սպասվում էր:
«Վերջնական արդյունքը մենք կտեսնենք մեծ ժամանակամիջոցից հետո: Զրույցներն ամենագլխավորը չեն: Ես կարծում եմ, որ, հենվելով այն բանի վրա, ինչ ես լսել եմ, ամեն ինչ անցել է լավ, գուցե ավելի լավ, քան սպասվում էր»,-նշել է պետության ղեկավարը:
Թրամփը հույս է հայտնել, որ Միացյալ Նահանգները եւ ՆԱՏՕ-ն «կկարողանան համաձայնության գալ» Ռուսաստանի հետ: «Հիանալի կլիներ, եթե ՆԱՏՕ-ն եւ մեր երկիրը կարողանային համաձայնության գալ Ռուսաստանի հետ»,-ասել է Թրամփը: Նա այն կարծիքն է հայտնել, որ այս պահին երկու երկրների միջեւ հարաբերությունները, հնարավոր է, գտնվում են «ամենացածր մակարդակում»:
«Բայց տեսնենք՝ ինչ կլինի: Պուտինը Ռուսաստանի ղեկավարն է, Ռուսաստանն ուժեղ երկիր է: Մենք շատ, շատ ուժեղ երկիր ենք: Տեսնենք, թե դրանից ինչ կստացվի»,-հավելել է Միացյալ Նահանգների ղեկավարը, հաղորդել է ՏԱՍՍ-ը:
