ԵՄ-ի երկրների ղեկավարները խոստացել են միասնական ճակատով հանդես գալ Լոնդոնի հետ բանակցություններում
ԵՄ-ի 27 երկրների ղեկավարները խոստացել են միասնական ճակատով գործել Brexit-ի պայմանների շուրջ Լոնդոնի հետ բանակցություններում: Այդ մասին ասված է ԵՄ-ի մնացած երկրների ղեկավարների հրապարակված հռչակագրում, որը տարածվել է այն բանից հետո, երբ ԵՄ-ում Մեծ Բրիտանիայի մշտական ներկայացուցիչը Եվրախորհրդի ղեկավար Դոնալդ Տուսկին է փոխանցել Brexit-ի գործարկման մասին Լոնդոնի պաշտոնական ծանուցագիրը:
«Մենք ափսոսում ենք, որ Մեծ Բրիտանիան լքում է ԵՄ-ն, բայց մենք պատրաստ ենք առաջիկա գործընթացին»,-նշվում է փաստաթղթում:
«Եվրամիության համար առաջին քայլը կդառնա Եվրախորհրդի կողմից Մեծ Բրիտանիայի հետ բանակցություններ վարելու համար մեր հանձնարարականների հաստատումը: Այդ հանձնարարականները կներկայացնեն այն ընդհանուր դիրքորոշումներն ու սկզբունքները, որոնց լույսով Եվրահանձնաժողովով ներկայացված հանրակցությունը բանակցություններ կվարի Միացյալ Թագավորության հետ, նշվում է հռչակագրի տեքստում: Մենք այդ բանակցություններին կմոտենանք կոնստրուկտիվորեն եւ կփորձենք համաձայնության գալ: Ակնկալում ենք, որ ապագայում Միացյալ Թագավորությունը կլինի մեր սերտ գործընկերը»:
«Այդ բանակցություններում միության բոլոր անդամները գործելու են որպես մեկ ամբողջություն՝ պաշտպանելով Եվրամիության շահերը: Մեր առաջին գերակայությունը պետք է դառնա մեր պետությունների, քաղաքացիների ու մեր բիզնեսի համար այն անորոշությունները նվազագույնի հասցնելը, որոնք պայմանավորված են Միացյալ Թագավորության որոշմամբ»,-ասված է հայտարարության մեջ:
Մեծ Բրիտանիայի վարչապետ Թերեզա Մեյը, մարտի 29-ին՝ ելույթ ունենալով բրիտանական խորհրդարանի Համայնքների պալատում, Եվրամիության իշխանություններին ծանուցել է ԵՄ-ի կազմից երկրի դուրս գալու ընթացակարգի պաշտոնական գործարկման մասին:
Մեյը պատմական պահ է համարել Brexit-ի գործարկումը, որը հետդարձի ճանապարհ չունի: «Սա պատմական պահ է, որը հետդարձի ճանապարհ չունի: Մեծ Բրիտանիան լքում է Եվրամիությունը: Մենք պատրաստվում ենք ընդունել սեփական որոշումներ ու սեփական օրենքներ»,-ասելէ նա, հաղորդել է ՏԱՍՍ գործակալությունը։
