Շվեյցարիայում Էրդողանի դեմ պարզված պաստառի գործով հետաքննություն է սկսվել
Շվեյցարիայի Բեռն քաղաքի դատախազությունը հետաքննություն է սկսել` կապված Էրդողանի դեմ կազմակերպված ցույցի ժամանակ բացված պաստառի հետ: Այս մասին հայտնում է թուրքական «Անադոլու» գործակալությունը:
Շվեյցարիայում Թուրքիայի նախագահ Ռեջեփ Թայիփ Էրդողանի ու թուրքական կառավարության քաղաքականությունը դատապարտող բողոքի ակցիա է կազմակերպվել: Բողոքի ակցիայի` մի քանի հազարի հասնող մասնակիցները Բեռնում կոչ են արել երկրում պահպանել ազատություններն ու ժողովրդավարությունը: Ցուցարարները նաև մեծ սև պաստառ են պատրաստել, որի վրա պատկերված է եղել Թուրքիայի նախագահը, ում գլխի մոտ նկարված է եղել ատրճանակ: Պաստառի վրա եղել է հետևյալ գրությունը.
«Սպանեք Էրդողանին նրա սեփական զենքերով»: Ցույցի ժամանակ բարձրացվել են Քրդական բանվորական կուսակցության (PKK) խորհրդանիշները: Թուրքիայի արտաքին գործերի նախարարությունը հայտարարություն էր տարածել դեպքի առնչությամբ: Շվեյցարիայի դեսպանության գործերի հավատարմատարը կանչվել էր Թուրքիայի ԱԳՆ:
ԱԳՆ-ում ցույցը որակել են որպես բռնությունն ու ահաբեկչությունը խրախուսող
գործողություն: Թուրքիայի արտաքին քաղաքական գերատեսչությունից հայտնել են, որ հետևում են Շվեյցարիայի դաշնային կառավարության կողմից այս ցույցի առնչությամբ ձեռնարկելիք իրավական ու վարչական քայլերին:
Հայտարարության մեջ նշվում է նաև, որ խնդրի առնչությամբ արտգործնախարար Մևլութ Չավուշօղլուն հեռախոսազրույց է ունեցել շվեյցարացի գործընկերոջ հետ:
