Հոսնի Մուբարաքը Կահիրեի հոսպիտալից տուն է վերադարձել
Եգիպտոսի նախկին նախագահ Հոսնի Մուբարաքը մարտի 24-ին դուրս է գրվել Կահիրեի Մաադիի շրջանի զինվորական հոսպիտալից եւ տուն վերադարձել վեց տարի կալանքի տակ գտնվելուց հետո: Այդ մասին «ԱլՄասրի ալՅաում» եգիպտական հրատարակությանը հայտնել է նրա փաստաբան Ֆարիդ ադ Դիբը:
Վերջին տարիներին Մուբարաքը, որին միանգամից մի քանի մեղադրանք էր առաջադրել, կալանքի տակ էր գտնվում զինվորական հոսպիտալում:
Մարտի սկզբին Եգիպտոսի վերաքննիչ դատարանը նախկին նախագահի նկատմամբ վերջնական արդարացնող վճիռ կայացրեց 2011 թվականի հունվարյան անկարգությունների ընթացքում ցուցարարների զոհվելուն մեղսակից լինելու մեղադրանքի գործով: Ավելի ուշ գլխավոր դատախազությունը համաձայնություն տվեց կալանքից նրան ազատելուն:
Ինչպես հայտարարել է նրա փաստաբանը, վերջին օրերին 88-ամյա Մուբարաքը հոսպիտալում էր մնում բացառապես բժշկական նկատառումներով եւ իրավունք ուներ ցանկացած պահի հեռանալ այնտեղից:
Տանը Մուբարաքին դիմավորել են նրա ընտանիքի բոլոր անդամները: «Նա ընտանիքի եւ ընկերների հետ միասին ճաշակել է եգիպտական ավանդական կերակրատեսակներից մեկը»,-հավելել է ադ Դիբը, հաղորդել է ՌԻԱ Նովոստին:
