«Ես ավելի հեռու կգնամ, ես մեղադրում եմ հանրապետության նախագահին». Ֆիյոնը մեղադրել է Օլանդին
Ֆրանսիայի նախագահի պաշտոնի թեկնածու Ֆրանսուա Ֆիյոնը նախագահ Ֆրանսուա Օլանդին մեղադրել է այն բանում, որ նա, չարաշահելով իր դիրքը, նպաստում է վարկաբեկիչ նյութերի արտահոսին՝ իր ընտրվելը կանխելու նպատակով: Այս մասին հաղորդել Է Reuters-ը:
Ֆիյոնը, մասնավորապես, նշել է, որ իշխանության վերահսկողության տակ գտնվող թերթերը փաստաթղթերն ստացել են Ազգային ժողովի իր առանձնասենյակում խուզարկության ժամանակ դրանց առգրավումից 48 ժամ հետո: «Ո՞վ է նրանց տրամադրում այդ փաստաթղթերը»,-հարց էտալիս նա:
Երբ Ֆիյոնին հարցրել են, թե, նրա կարծիքով՝ ով է դրա համար պատասխանատվություն կրում. այս կամ այն քաղաքական գործիչները թե արդարադատության համակարգը, թեկնածուն հայտարարել է. «Ես ավելի հեռու կգնամ, ես մեղադրում եմ հանրապետության նախագահին»:
Դրան ի պատասխան Ելիսեյան պալատը հայտարարել է, որ Օլանդն «ամենախիստ կերպով դատապարտում է Ֆիյոնի շինծու մեղադրանքները»:
«Գործադիր իշխանությունը երբեք չի միջամտել որեւէ դատական ընթացակարգի եւ միշտ անվերապահորեն հավատարիմ է եղել դատական իշխանության անկախությանը»,-ասված է հայտարարության մեջ:
