Ֆրանսիայի իշխանությունները Ֆիյոնին կասկածում են «ծանրացուցիչ հանգամանքներով խարդախության» մեջ. Monde
Ֆրանսիայի նախագահի պաշտոնի թեկնածու Ֆրանսուա Ֆիյոնի նկատմամբ հետաքննությունը նոր ընթացք է ստացել: Ինչպես մարտի 21-ին հայտնել է Le Monde թերթը, Ազգային ֆինանսական դատախազության քննիչները քաղաքական գործչին կասկածել են Ազգային ժողովում որպես օգնական կնոջը՝ Պենելոպա Ֆիյոնին աշխատանքի տեղավորելիս կեղծ փաստաթղթերի օգտագործման մեջ։
Ինչպես ընդգծում է հրատարակությունը, «դատախազությունը գործը վարող դատավորներին լրացուցիչ մեղադրական եզրակացություն է ուղարկել «ծանրացնող հանգամանքներով խարդախություն» եւ «կեղծ փաստաթղթերի օգտագործում» հոդվածներով:
Մարտի 14-ին Ֆիյոնին մեղադրանք էր առաջադրվել «պետական միջոցների հափշտակում» եւ «ազդեցության առուծախ» հոդվածներով: «Իսկ այժմ հիմքեր են ի հայտ եկել կարծելու, որ Պենելոպայի աշխատանքային ամփոփագրերը կարող են կեղծ լինել»,-պարզաբանում է թերթը:
«Քննիչներն այս եզրակացությանն են հանգել այն փաստաթղթերի ուսումնասիրությունից հետո, որոնք գտնվել են մարտ ամսվա կեսերին Ազգային ժողովում կատարված խուզարկություններից մեկի ժամանակ: Քաղաքական գործչի կնոջ ստորագրած տարբեր ամփոփագրեր տարբեր տվյալներ են բովանդակում աշխատանքային ժամերի վերաբերյալ»,-պարզաբանում է հրատարակությունը, հաղորդել է ՏԱՍՍ-ը:
