Թուրքիայի արդարադատության նախարարը Ֆեթուլլահ Գյուլենի հարցով խոսելու է ԱՄՆ գործընկերոջ հետ
Թուրքիայի արդարադատության նախարար Բեքիր Բոզդաղը այս գիշեր հեռախոսազրույց է ունենալու ԱՄՆ արդարադատության նախարարի հետ: Այս մասի հայտնում է թուրքական «Հուրիեթ» պարբերականը:
Հեռախոսազրույցի ժամանակ Բեքիր Բոզդաղը ԱՄՆ գործընկերոջ հետ քննարկելու է «Հիզմեթ հարեքեթի» ազդեցիկ կրոնական շարժման առաջնորդ Ֆեթուլլահ Գյուլենի հարցը, ով 1998 թվականից որպես քաղաքական վտարանդի բնակվում է ԱՄՆ-ի Փենսիլվանիա նահանգում:
«Այսօր երեկոյան ես հեռախոսազրույց կունենամ իմ ԱՄՆ գործընկերոջ հետ, և մենք կրկին կքննարկենք գյուլենականների առաջնորդ Ֆեթուլլահ Գյուլենի արտահանձնման հարցը»,-ասել է Բոզդաղը:
Այժմ Էրդողանը փորձում է հասնել ԱՄՆ-ից Գյուլենի արտահանձնմանը: Գյուլենն, իր հերթին, դարձել է Էրդողանի առավել նշանակալից քննադատներից մեկը:
2014-ի դեկտեմբերին Ստամբուլի դատական իշխանությունները Գյուլենին ձերբակալելու հայտ են ներկայացրել` Թուրքիայի իշխող «Արդարություն և զարգացում» կուսակցության դիրքերը խարխլելու մեղադրանքով:
Թուրքական իշխանությունները Գյուլենի գործունեության վերաբերյալ բազմաթիվ թղթածրարներ են ուղարկել ԱՄՆ իշխանություններին և ամեն պատեհ առիթ օգտագործում են նրան ետ վերադարձնելու և թուրքական արդարադատության առաջ կանգնեցնելու համար:
