ԱՄՆ-ում ռուսաստանցի Մարկ Վարդանյանին համակարգչային խարդախության մեղադրանք է առաջադրվել
ՌԴ-ի քաղաքացի Մարկ Վարդանյանին, որը 2016 թվականի դեկտեմբերին ԱՄՆ-ին է արտահանձնվել Նորվեգիայի կողմից, առաջադրվել է համակարգչային խարդախության մեղադրանք: Այս մասին հայտնել է Ջորջիայի նահանգի Հյուսիսային օկրուգի դատախազությունը:
Միացյալ Նահանգների իշխանությունները ռուսաստանցուն մեղադրում են «Citadel վնասաբեր ծրագրի մշակման, կատարելագործման եւ վաճառքի մեջ, որը նախատեսված է համակարգչային համակարգերի ախտահարման եւ ֆինանսական հաշիվների հաշվառման գրանցումների ռեկվիզիտների հափշտակման համար»:
Դատախազությունը վկայակոչում է պրոֆիլային փորձագետների գնահատումները, որոնց համաձայն՝ Citadel-ը «մոտավորապես 11 միլիոն համակարգիչներ է ախտահարել ամբողջ աշխարհում եւ պատասխանատվություն է կրում ավելի քան 500 միլիոն դոլարի չափով»:
Վարդանյանը, որն աշխատում էր նորվեգական ընկերության համար եւ բնակվում էր Ֆրեդրիքստադ քաղաքում, ԱՄՆ-ի իշխանությունների պահանջով ձերբակալվել է 2014 թվականի հոկտեմբերին եւ այդ ժամանակվանից ի վեր գտնվում է նախնական կալանքի տակ:
ԱՄՆ-ի հատուկ ծառայությունների վարկածով՝ ծրագրավորողը Համացանցում բեռնել է 48 ֆայլ, որոնք անհրաժեշտ են Citadel վիրուսի տեղակայման եւ դրա միջոցով ուրիշների համակարգիչների կառավարման համար: Վարդանյանն իր մեղքը ժխտել է եւ պնդել, որ երբեք այդ ֆայլերը չի զետեղել Համացանցում:
Օսլոյում եւ Վաշինգտոնում ՌԴ-ի դիվանագիտական ներկայացուցչությունները Վարդանյանին աջակցություն են ցույց տալիս ԱՄՆ-ում հավանական դատական քննության պատրաստման գործում, հետեւում են նրա բոլոր իրավունքների եւ շահերի պաշտպանությանը:
Ռուսաստանցի դիվանագետները նաեւ նշում են, որ Նորվեգիայի իշխանությունները բավականաչափ ուշադրություն չեն դարձրել նորվեգացի փորձագետների փաստարկներին, որոնք նշել են, որ Հետաքննությունների համերկրային բյուրոն ռուսաստանցու մեղքի ուղղակի ապացույցներ չի ներկայացրել, հաղորդել է ՏԱՍՍ-ը:
