Թուրքիան առկախել է Նիդերլանդների հետ բարձր մակարդակի հարաբերություններն ու շփումները
Թուրքիայի փոխվարչապետ Նուման Քուրթուլմուշը հայտարարել է Նիդերլանդների հետ բարձր մակարդակի հարաբերությունները, նախատեսված հավաքները և բարձր մակարդակի հանդիպումներն առկախելու որոշման մասին:
Այս մասին հայտնում է «Ակոս» պարբերականը: Մասնավորապես, փոխվարչապետը հայտնել է, որ իրենք չեղյալ են համարել Նիդերլանդների համար դիվանագետների և բարձրաստիճան պաշտոնյաների կողմից Թուրքիայի օդային տարածքն օգտագործելու թույլտվությունը:
«Այս պահին արտերկրում գտնվող Նիդերլանդների դեսպանի վերադարձը Թուրքիա արգելված է, քանի դեռ չեն կատարվել մեր մատնանշած կետերը»,-հայտնել է Քուրթուլմուշը:
Նա տեղեկացրել է, որ որոշում է ընդունվել խորհուրդ տալ մեջլիսին չեղյալ համարել ԹուրքիաՆիդերլանդների խորհրդարանական բարեկամական խմբի թուրքական հատվածը:
«Եթե այս քաղաքական որոշումները լրջորեն չընդունվեն, եթե Նիդերլանդները առաջացած ճգնաժամը վերացնելու ուղղությամբ անհրաժեշտ քայլեր չձեռնարկի, Թուրքիան այլ ոլորտներում ևս իր մտածած քայլերը կաշխատի կյանքի կոչել»,-ասել է փոխվարչապետը` հայտարարելով, որ իրենք ներողություն են ակնկալում Նիդերլանդներից:
