«365 օրվա ընթացքում երկիրը դուրս ենք բերելու այս իրավիճակից». ՕՐՕ դաշինք
«Օհանյան-Րաֆֆի-Օսկանյան» քաղաքական դաշինքի ներկայացուցիչներ Արմեն Մարտիրոսյանը, Ստեփան Մարգարյանը, Էլինար Վարդանյանը լրագրողների հետ հանդիպման ժամանակ այսօր ներկայացրեցին քարոզարշավի ընթացքը:
«Հասարակության մոտ մեր նկատմամբ վերաբերմունքը բացասական չէ: Բոլոր կողմերից դրական արձագանք ենք ստանում: Միանշանակ, մեր քարոզարշավը լայն թափով շարունակվելու է: Ի դեմս «Օհանյան-Րաֆֆի-Օսկանյան» (ՕՐՈ) դաշինքի` հասարակությունն իսկապես տեսնելու է այն այլընտրանքը, որ երկիրը դուրս է բերելու այս իրավիճակից»,- ասաց Արմեն Մարտիրոսյանը:
Ստեփան Մարգարյանը ներկայացրեց դաշինքի ծրագիրը.
«Մենք հստակ ծրագրով ենք հանդես գալիս, որը պարունակում է մի շարք կարևոր մասեր, պայմանական ասած` «365 օր» ծրագիր է: Սրա իմաստը նրանումն է, որ փոփոխությունները հայտարարելու ու խոստումներ տալու փոխարեն` մենք առաջարկում ենք ծրագիր, որով ամենօրյա ռեժիմով հասարակությունը զգալու է երկրում իրականացվող փոփոխությունները: Մեկ տարվա ընթացքում երկիրը լուրջ փոխվելու է, եթե ունենանք այն լծակները, որով պետք է իրականացնենք այս ծրագիրը: Ծրագրում սոցիալական ցանկացած խավ իրեն տեսնում է, և ամեն մեկի համար կա իրեն վերաբերող մաս, իր խնդիրները լուծող առաջարկ: Ծրագիրը շատ իրատեսական է, շատ լուրջ մասնագիտական փորձաքննություն է անցած, զերծ է որևէ պոպուլիստական էլեմենտից»:
Էլինար Վարդանյանը խոսելով ծրագրի մասին՝ ասաց.
«Ծրագիրն առաջարկում է լուծումներ, որոնք տեղի կունենան 365 օրվա ընթացքում, ամեն օրվա կտրվածքով` յուրաքանչյուր քաղաքացի իր առօրյա կյանքում կզգա, թե ի՞նչ փոփոխություններ են տեղի ունեցել: Ծրագրում կան նաև դեմոգրաֆիկ խնդիրներին ուղղված դրույթներ, որոնք վերաբերում են միանվագ նպաստներին, ինչը հնարավորություն կտա երեխայի ծնունդից հետո նպաստների միջոցով գոնե մասամբ լուծել այն խնդիրները, որոնք ունենում են ընտանիքները»:
Անդրադառնալով մարզերում ու գյուղերում անցկացվող քարոզարշավին` Արմեն Մարիտրոսյանը նշեց.
«Այնպես չէ, որ նոր եմ ծանոթանում, թե ինչ վիճակ է մեր մարզերում, գյուղերում: Բայց այն, ինչ տեսնում ենք նորից, ևս մեկ անգամ մեզ համոզում է, որ պետք է փոփոխություններ իրականացնենք: Կա համընդհանուր թշվառություն, հուսալքություն, անճարություն, որ այս իշխանությունները հասցրել են ժողովրդին, իսկ սա անթույլատրելի է: Ժողովուրդն իշխանությունից լքված է, իր խնդիրների հետ դեմ հանդիման է, իսկ լուծման ուղիները նվազագույնի են հասցված: Ժողովրդի հիմնական մասն էլ լուծումը տեսնում է արտագաղթի միջոցով, այսինքն` սոցիալ-տնտեսական խնդիրները լուծելուն միտված քայլեր է անում: Ժողովուրդը Հայաստանում կորցրել է արդարությունը, ու, ցավոք, չի էլ փնտրում այստեղ»:
Էլինար Վարդանյանը հավելեց.
«Նույն իրավիճակը նաև Երևանում է, եթե սոցիալ-տնտեսական իրավիճակը մի կողմ թողնենք, ապա արդարության պակասը նաև Երևանում է: Այս համատարած արդարության բացակայությունն է, որ պատճառ է դառնում նաև արտագաղթի: Բազմաթիվ հարցումներ ցույց են տվել, որ մարդիկ Հայաստանից հեռանում են հենց արդարության պակասի պատճառով, հետևաբար՝ մեր հասարակությանը պետք է տալ ազատություն` ապրելու, արարելու և գործելու: Այսօր այս ազատությունից հասարակությունը զրկված է»:
Ըստ Արմեն Մարտիրոսյանի` իշխանությունները ժողովրդի ձեռքից վերցրել են ամեն ինչ, բացի ձայնից: Նա նշեց մի քանի թեզեր, որոնց միջոցով իշխանությունները փորձում են վերարտադրվել:
- Մարդկանց մատնում են համատարած հուսալքության, որ որևէ բան չի փոխվելու, այսինքն` իրենք անպարտելի են, կամ էլ` ով էլ գա, նույնն է լինելու:
- Առձեռն փող, որի միջոցով փորձելու են ձայնը գնել:
- Եվ կեղծ սոցիոլոգիական հարցումներ են իրականացնելու:
Արմեն Մարտիրոսյանը նաև հաղորդեց, որ Րաֆֆի Հովհաննիսյանն այս պահին ԱՄՆ-ում է` գործնական հանդիպումների պատճառով, բայց ցանկացած պահի կարող է միանալ քարոզարշավին:
«Այն ուժը, որը երկիրը հասցրել է այս վիճակին, որևէ առաքելություն այլևս չունի: Անհեթեթություն է նույն ուժի վերարտադրվելը: Երկրին անհրաժեշտ է փոփոխություն, և մենք առաջարկում ենք այդ փոփոխությունը»,- եզրափակեց Ստեփան Մարգարյանը:
Անի Թորոսյան
