Մերկելը պահանջել է Էրդողանից Գերմանիայի իշխանություններին այլևս չնմանեցնել նացիստներին
Գերմանիայի կանցլեր Անգելա Մերկելը պահանջել է Թուրքիայի նախագահ Ռեջեփ Թայիփ Էրդողանից դադարեցնել իրենց երկիրը նացիստական անվանելուց:
Այս մասին հայտնում է թուրքական Diken գործակալությունը: Ասելով, որ Թուրքիան Գերմանիայի կարևոր գործընկերներից է, խորհրդարանում ելույթ ունեցող Մերկելը հայտարարել է, որ այդուհանդերձ իրենց նացիստների հետ համեմատելը տխրեցնում է:
«Մենք չենք ցանկանում Թուրքիայիներքին բախումները տեղափոխել Գերմանիա և այդ
նպատակով անում ենք հնարավոր ամեն բան», հայտարարել է կանցլերը:
Պահանջելով դադարեցնել իրենց նացիստների հետ համեմատելուց` Մերկելը կոչ է արել անհապաղ ազատ արձակել Թուրքիայում բանտարկված գերմանական Die Welt պարբերականի լրագրող Դենիզ Յուջելին:
Գերմանիայի Համբուրգ քաղաքի Plaza Event Center սրահում նախատեսված Թուրքիայի արտաքին գործերի նախարար Մևլութ Չավուշօղլուի միջոցառումը, որը տեղի էր ունենալու սահմանադրական հանրաքվեի քարոզարշավի շրջանակում, չեղյալ էր համարվել: Արտգործնախարարը ստիպված էր եղել ելույթ ունենալ Թուրքիայի հյուպատոսի կեցավայրում:
Գերմանական տեղական իշխանությունները չեղյալ էին հայտարարել Թուրքիայի արդարադատության նախարար Բեքիր Բոզդաղի ելույթը Գերմանիայի Գագգենաու քաղաքում:
Կատարվածի քննադատությամբ էր հանդես եկել նախագահ Էրդողանը, ով հայտարարել էր, թե Գերմանիան իր պահվածքով նմանվում է նացիստների գործելաոճին: Էրդողանի հայտարարությունը կրկնել էր նաև արտգործնախարար Չավուշօղլուն:
