Վահագն Հայրապետյանին կարելի էր, Ռոլանդին չէ՞ր կարելի. «ՀԺ»
«Հայկական ժամանակ» օրաթերթը գրում է. «Նախօրեին մեկնարկեց խորհրդարանական ընտրությունների քարոզարշավը: Գուցե կգան ժամանակներ, երբ մեր երկրում քարոզարշավը բովանդակային խոսակցության վրա կկառուցվի, բայց այդ ժամանակները դեռ հեռու են: Իսկ ամեն անգամ, երբ առաջադեմ հասարակությունն իր ողջ ինտելեկտուալ էներգիան կենտրոնացնում է ՀՀԿ-ի նախընտրական տեսահոլովակում նկարահանված անհատներին ոչնչացնելու ուղղությամբ, այդ ժամանակներն ավելի ու ավելի են հեռանում։
Քարոզարշավի առաջին օրվա ամենանշանակալի իրադարձությունը դարձավ ՀՀԿ‐ի քարոզչական տեսահոլովակը`«Ռեինկարնացիա» խմբի կատարմամբ: Տեսահոլովակը կոչվում է «Փոխենք աշխարհը», երգի բառերն ու երաժշտությունը «Ռեինկարնացիայինն» են, ռեժիսորական աշխատանքը`«Շարմ»‐ինը: ՀՀԿ-ի նախընտրական պաշտոնական կայքում ևս մեկ տեսահոլովակ կա՝ «Մենք Հայաստանն ենք» վերնագրով։ Երկուսն էլ շատ հարմար կլինեին տուրիսսատական գործակալություններով տարածելու համար՝ որպես Հայաստանը գովազդող ուրախ և պայծառ տեսահոլավակներ։ Քաղաքական քարոզչության համար դրանք անպիտան են։ «Ռեինկարնացիայի» երգում, ճիշտ է, խոսքը փոխելու և փոխվելու մասին է, ինչը ՀՀԿ-ի նախընտրական կարգախոսներից է, բայց քանի որ հստակ չէ՝ ով փոխվի և ինչու փոխվի, բովանդակային բաց կա, որն էապես թուլացնում է ասելիքը։
Քարոզչության տեսակետից այս հոլովակը հաջողված է թերևս միայն հարվածային գործիքներ նվագող վարչապետի կերպարով: Բայց այս ամենը չէ, որ քննարկվում է սույն տեսահոլովակի մասին: Քննարկման թեման լուրջ և խորքային է, մասնավորապես` ի՞նչ բարոյական իրավունքով է «Ռեինկարնացիա» խումբը մասնակցում ՀՀԿ‐ի քարոզարշավին: Խմբի ֆեյսբուքյան էջը ողողված է հայհոյանքներով: Վտանգի տակ է մարտի 8‐ի նրանց համերգը. նախապես տոմս գնած հանդիսատեսը բարձրացված աղմուկի պատճառով վերադարձնում է տոմսերը, ովքեր չէին հասցրել գնել` այլևս չեն գնի, որովհետև իրենք ՀՀԿ ընտրող չեն: Չգիտենք իհարկե քվեախցիկում հայտնվելով ում կընտրեն, ում չեն ընտրի, բայց համերգին հաստատ չեն գնա:
Հայաստանում քիչ կան «Ռեինկարնացիայի» նման խմբեր` նոր սերնդի երաժիշտներ, որ սեփական քրտինքով, սեփական ստեղծագործությամբ հասել են հաջողությունների և սիրվել են բոլորի կողմից: Թվում է, թե Հայաստանի հասարակությունը պետք է փայփայի իր այսպիսի զավակներին, ովքեր հաջողություն չեն փնտրում արտերկրում, ապրում և ստեղծագործում են իրենց երկրում, ի տարբերություն հազարավորների, չեն հայտարարում` այստեղ ապագա չկա ու արտագաղթում:
Բայց ոչ, Հայաստանի առաջադեմ, ինտելեկտուալ և արդարամիտ հասարակությունը սիրում է միայն արտագաղթողներին: Իսկ Ռոլանդի նման երիտասարդներին շատ լուրջ հարցեր ունի ուղղելու. օրինակ` իրենք գիտե՞ն, որ երկիրն այս վիճակին ՀՀԿ‐ն է հասցրել, իրենք գիտե՞ն, որ երկրում արդարություն չկա, գիտե՞ն, որ Սերժ Սարգսյանը կործանում է Հայաստանը, Մարտի մեկի սպանդի մասին լսե՞լ են, գիտե՞ն բնակչության քանի տոկոսն է ապրում աղքատության ճիրաններում, համախառն ներքին արդյունքից տեղյա՞կ են, տեսե՞լ են` խանութներում շաքարավազի գինը, գիտե՞ն, որ իրենց տեսահոլովակի հեռարձակման պահին «Հաց բերողի» հացադուլի 20‐րդ օրն էր: Եվ ինչպե՞ս կարող էին այսքանից հետո ՀՀԿ‐ի համար երգ գրել, Սերժ Սարգսյանի հետ նույն դահլիճում կանգնել, համերգ տալ: Ընդհանրապես չգիտե՞ն, որ արվեստագետը պետք է հեռու մնա քաղաքականությունից:
«Ռեինկարնացիայի» երիտասարդները չեն կարող սույն հարցերին սպառիչ պատասխան տալ, նրանք այդքան խորը գիտելիքներ, բարձր քաղաքացիական գիտակցություն, հայրենասիրություն և ինտելեկտ չունեն: Նրանք միայն փորձում են պաշտպանվել ԶԼՄ‐ներին ասելով, որ իրենք չեն կիսում որևէ քաղաքական ուժի գաղափարախոսությունը, այլ ուժերից նույնպես առաջարկներ ունեն ու չի բացառվում, որ երգեն նաև ընդդիմադիրների համար: Նկատի ունեն, իրենք ընդամենը երգել են, գուցե մի քիչ էլ հիացել են թմբուկ նվագող վարչապետով, բայց արդյոք դրա համար գնդակահարություն է հասնում:
Հայաստանի ամենաինտելեկտուալ եւ ամենահայրենասեր հատվածին, սակայն, հնարավոր չէ նման արդարացումներով շեղել խնդրի բուն էությունից: Մինչև քարոզարշավի ավարտը թերևս կքննարկվի` արդյո՞ք «Ռեինկարնացիայի» արածը պոռնկությունից էլ վատ չէր:
Նախօրեին «Արմենիա Մարիոթ» հյուրանոցում քարոզարշավի մեկնարկը տվեց նաև «Ելք» դաշինքը: Միջոցառմանը մասնակցում էր հայտնի դաշնակահար, ջազմեն Վահագն Հայրապետյանը, որի կատարման տակ էլ դաշիքնի թեկնածուները մտան դահլիճ: Այս փաստը որևէ մեկը չնկատեց, հարցեր չառաջացան, թե ինչ գործ ունի ջազմենը քաղաքական ուժի միջոցառմանը: Որևէ մեկը չմեկնաբանեց, թե Վահանգ Հայրապետյանի ներկայությունը նշանակում էր, որ նա համակրում է այդ ուժին և առաջիկա ընտրություններում իր ձայնը տալու է հատկապես «Ելք»‐ին: Քարոզչական նման «անգին» աջակցություն ընդդիմադիր դաշինքը չստացավ»:
Ամբողջությամբ կարող եք կարդալ «Հայկական ժամանակ» օրաթերթի այսօրվա համարում։
