«Ադրբեջանը պոտենցյալ է տեսնում Ռուսաստանի հետ առևտրաշրջանառության ավելացման հարցում». Մամեդյարով
Այսօր Ադրբեջանի և Ռուսաստանի միջև առևտրաշրջանառությունը ավելանում է, երկու երկրների միջև փոխհարաբերությունները անցած 25 տարում լուրջ դժվարություններ ու ցնցումներ չեն կրել, հայտարարել է Ադրբեջանի ԱԳՆ ղեկավար Էլմար Մամեդյարովն այսօր ՌԴ արտգործնախարար Սերգեյ Լավրովի հետ հանդիպմանը։
Նրա խոսքով՝ անհրաժեշտ է ավելի շատ աշխատել երկու երկրների միջև առևտրաշրջանառության ավելացման ուղղությամբ, հայտնում է ադրբեջանական Trend գործակալությունը։
«Ադրբեջանում սիրում ու հարգում են ռուսաց լեզուն, երկրում կան բազմաթիվ ռուսալեզու դպրոցներ և բուհեր, ռուսական բուհերը մասնաճյուղեր են բացում մեր երկրում»,- ասել է Մամեդյարովը։
Մամեդյարովի այցը պաշտոնական է, այն կտևի մինչև մարտի 7-ը։
Ադրբեջանի պետական մաքսային կոմիտեի տվյալով՝ երկու երկրների միջև առևտրաշրջանառությունը 2016թ. կազմել է 2,05 մլրդ դոլար, ինչը 10.5 տոկոսով գերազանցում է նախորդ տարվա ցուցանիշը։
