«Քրեակատարողական հիմնարկի բժշկական անձնակազմը հնարավորություն չունի արձանագրել հստակ պատկերը». ՔԿՎ պարզաբանումը՝ «հաց բերողի» վերաբերյալ
Անազատության մեջ գտնվող Արթուր Սարգսյանի՝ «հաց բերողի» համար այսօր ևս շտապօգնություն է հրավիրվել: ՀՀ արդարադատության նախարարության Քրեակատարողական վարչության հաղորդմամբ՝ նա հրաժարվել է բուժօգնությունից։
Այսօր Արթուր Սարգսյանի պաշտպան Տիգրան Եգորյանն իր ֆեյսբուքյան էջում գրել էր, որ «ըստ Արթուրի՝ երբ նա մեջքի վրա կիսանստած, անկողնին հենված վիճակից թեքվում էր կողքի, բերանի խոռոչից արյուն էր հոսում»։ Այս առնչությամբ ՀՀ ԱՆ ՔՎ-ն հայտնում է հետևյալը. «Ըստ էության՝ վարչակազմի կողմից արյունային փսխումներ չեն արձանագրվել։ Նկատվել է միայն արյան հետք անձեռոցիկի վրա, ինչն իր ախտորոշված հիվանդության պարագայում հնարավոր է։ Սակայն, քանի որ Ա. Սարգսյանը հրաժարվում է առհասարակ որևէ տեսակի բժշկական օգնությունից, ուստի քրեակատարողական հիմնարկի բժշկական անձնակազմը հնարավորություն չունի արձանագրել հստակ պատկերը և անհրաժեշտության դեպքում ցուցաբերել պատշաճ բժշկական օգնություն»։
