«Մենք ինչ անենք, պետք է անենք խելացի, գյուղատնտեսությունը` խելացի, IT-ն` խելացի, սպորտը` խելացի, պաշտպանությունը` խելացի…»
ՀՀ վարչապետ Կարեն Կարապետյանի համոզմամբ՝ ՀՀ կառավարությունը ձևակերպել է զարգացման ամբիցիոզ հորիզոն և վստահ է, որ որոշ ժամանակ անց ունենալու ենք մի պետությունը, որով բոլորս հպարտանալու ենք:
«Կառավարությունը՝ այսօրվա թիմը, ախտորոշել է մեր բոլոր ոլորտների խնդիրները, նեղ տեղերը, ձևակերպել տեսլական, թե ուր պետք է շարժվենք, ինչպես պետք է գնանք, ինչ միջոցառումներ պետք է իրականացնենք: Բավականին ռեալ, պրագմատիկ նյութ ենք ներկայացրել, հորիզոնը, որը մեզ համար ձևակերպել ենք՝ շատ ամբիցիոզ է, վստահ ենք, որ որոշ ժամանակ անց ունենալու ենք մի երկիր, որով բոլորս հպարտանալու ենք»,- Հայաստանի ազգային ագրարային պետական համալսարանում կրթաթոշակների հանձնման ժամանակ ունեցած իր ելույթում ասաց Կարեն Կարապետյանը:
Նրա խոսքով, մեր տարածաշրջանը, այն մարտահրավերները, որոնք կան, տրանսպորտային լոգիստիկան, որն ունենք, դրդում են մեզ, պահանջում, դարձնում հրամայական՝ լինելու խելացի և կիրթ: «Մենք ինչ անենք, պետք է անենք խելացի, գյուղատնտեսությունը` խելացի, IT-ն` խելացի, սպորտը` խելացի, պաշտպանությունը` խելացի, որևէ ոլորտ չկա, որտեղ կարող ենք թերանալ, մեզ թույլ տալ այստեղ կամ այնտեղ չլինել խելացի, չլինել ժամանակակից ու կիրթ»,- ասաց Կարեն Կարապետյանը:
