Գերմանացի պատգամավորները դեմ են Օբերհաուզեն քաղաքում Յըլդըրըմի հանրահավաքին
Գերմանիայի Բունդեսթագի մի խումբ պատգամավորներ հայտնել են իրենց մտահոգությունը` կապված գերմանական Օբերհաուզեն քաղաքում Թուրքիայի վարչապետ Բինալի Յըլդըրըմի կողմից կազմակերպվելիք հանրահավաքի հետ:
Այս մասին տեղեկացնում է գերմանական Deutsche Welleն: Գերմանիայի Կանաչների կուսակցության համանախագահ, ազգությամբ թուրք պատգամավոր Ջեմ Օզդեմիրն անընդունելի է համարել վարչապետի կողմից սահմանադրական հանրաքվեի վերաբերյալ հանրահավաքի անցկացումը գերմանական քաղաքում` առավել ևս, երբ Թուրքիայի ընդդիմությունը բանտարկված է:
«Դա խիստ հեռու է արդար ընտրական քարոզարշավի պայմաններից», հայտարարել է նա:Գերմանիայի Սոցիալդեմոկրատների կուսակցության պատգամավոր Ջանսել Քըզըլթեփեն մեղադրել է Յըլդըրըմին մանիպուլյացիայի մեջ:
«Այն, ինչ ցանկանում է Գերմանիայում անել վարչապետ Յըլդըրըմը, Թուրքիայի քաղաքացիներին խաբելն է», ասել է նա` ընդգծելով, որ սահմանադրական հանրաքվեն նպատակ ունի ավելացնել «Արդարություն և զարգացում» կուսակցության իշխանությունը:
Խնդրի առնչությամբ խոսել է նաև Բունդեսթագի մեկ այլ թուրք պատգամավոր` Սևիմ Դաղդելենը, ով նշել է, որ Էրդողանն ու Յըլդըրըմը Թուրքիայում ժողովրդավարությունը քանդողներից են: «Գերմանիայում միջոցառումների կազմակերպմամբ բռնապետության համար հարմար մթնոլորտ է ստեղծվում», ասել է նա:
Թուրքիայի վարչապետ Բինալի Յըլդըրըմն ապրիլի 16-ին նախատեսված Սահմանադրական հանրաքվեին ընդառաջ մեկնում է Գերմանիա:
Յըլդըրըմը Օբերհաուզեն քաղաքում փետրվարի 18-ին կազմակերպվելիք միջոցառման ժամանակ կոչ է անելու գերմանաբնակ թուրքերին «այո» ասել սահմանադրական հանրաքվեում:
