«Ադրբեջանի և Իսրայելի սերտ հարաբերությունները չեն նշանակում միայն զենքի առևտուր». Նեթանյահու
Իսրայելի և Ադրբեջանի կապերը համակեցության ակնառու օրինակ են։ Ադրբեջանական APA գործակալության հաղորդմամբ՝ այս մասին երեկ Ադրբեջանի նախագահ Իլհամ Ալիևի հետ կայացած համատեղ մամուլի ասուլիսի ժամանակ հայտարարել է Իսրայելի վարչապետ Բենիամին Նեթանյահուն։
Նրա խոսքով՝ երկու երկրների միջև սերտ հարաբերությունները չեն նշանակում միայն զենքի առևտուր, բացի դրանից, դա վկայում է փոխադարձ հարգանքի մասին։
«Իսրայելը երկիր է, որը դավանում է հուդայականություն, Ադրբեջանը՝ իսլամ։ Այստեղ մենք տեսնում ենք և՛ մուսուլմանների, և՛ հուդայականների համատեղ աշխատանքը, դա լավ ապագա է խոստանում երկու երկրներին»,- ասել է Նեթանյահուն։
Նա ընդգծել է, որ երկու երկրների միջև համագործակցությունն ընդլայնվելու է էներգետիկ, գյուղատնտեսության, կրթության և տեղեկատվական տեխնոլոգիաների ոլորտներում։
