«Ես արեցի ամեն ինչ Պրեմիեր լիգայի ֆուտբոլիստ դառնալու համար». Մխիթարյան

Հայաստանի ազգային հավաքականի և «Մանչեսթեր Յունայթեդի»  կիսապաշտպան Հենրիխ Մխիթարյանը պատասխանել է մանչեսթերյան ակումբի պաշտոնական կայքի հարցերին:

Մխիթարյանի փոքրիկ հարցազրույցը հրապարակվել է «Մանչեսթեր Յունայթեդի»  ֆեյսբուքյան պաշտոնական էջում:

Հենրիխը նշում է, որ մանկուց սիրել է հետևել Թիերի Անրիի խաղին: Հայ կիսապաշտպանը պատմել է, որ,  երբ Անրին հանդես էր գալիս «Արսենալում», ինքը փոքր էր և Անրիի նման խաղում էր հարձակվողի դիրքում:

Մխիթարյանը խոսել է նաև  «Մանչեսթեր Յունայթեդում» հանդես գալու և Պրեմիեր լիգայում հարմարվելու մասին:

«Ինձ համար միշտ հաճելի է խաղալ «Մանչեսթեր Յունայթեդի» կազմում:  «Յունայթեդի» կազմում խաղալը  երազանք էր: Միշտ ուրախ եմ խաղալու համար և կանեմ առավելագույնը թիմին օգնելու համար»,- նշել է Հենրիխը:

Ըստ Մխիթարյանի՝  անգլիական ֆուտբոլը շատ է տարբերվում այլ երկրներում դավանած ֆուտբոլից:

«Էական չէ՝ որտեղ ես խաղում՝ Գերմանիայում, Անգլիայում, Իսպանիայում կամ Ֆրանսիայում, պետք է հարմարվես այնտեղի ֆուտբոլին: Սկզբում մի փոքր բարդ էր, բայց ես արեցի ամեն ինչ Պրեմիեր լիգայի ֆուտբոլիստ դառնալու համար: Ես արել եմ այն ամենը, ինչ պահանջում էր մարզիչը, որպեսզի օգտակար լինեմ թիմին»,- նշում է Մխիթարյանը:

Սիրարփի Աղաբաբյան