ԱՄՆ-ն թվով երրորդ ռազմական բրիգադը կուղարկի Եվրոպա. AFP
ԱՄՆ-ը կշարունակի ուժեղացնել իր զորքերը Եվրոպայում, ինչպես դա պլանավորվել էր՝ անկախ նորընտիր նախագահ Դոնալդ Թրամփի մտադրությունից, հայտարարել է Պենտագոնի ներկայացուցիչ Փիթեր Կուկը։ Այս մասին հայտնում է AFP-ն։
«Մենք իրագործում ենք պլաններ, քանի որ դրանք համաձայնեցվել են ՆԱՏՕ-ի մեր դաշնակիցների հետ։ Մենք հաջորդ վարչակազմին կթողնենք իրենց քաղաքական որոշումներն արտահայտելը։ Մենք այսօր մեկ գերագույն գլխավոր հրամանատար ունենք»,- ասել է Կուկը։
Հաղորդագրության մեջ ասվում է, որ Վաշինգտոնը պլանավորում է փետրվարին սկսել Եվրոպայում հավելյալ ռազմական բրիգադի տեղակայումը, որպեսզի դրանց քանակությունը հասցնի 3-ի։ Տվյալ պլանը այն ջանքերի մաս է կազմում, որպեսզի բարձրացնի Արևելյան Եվրոպայի պաշտպանությունը Ռուսաստանի կողմից հնարավոր հարձակման դեպքում։
Նոր բրիգադը զորավարժություններ կանցկացնի Լեհաստանում, ինչից հետո նրա ստորաբաժանումների մի մասը կտեղակայվի Բուլղարիայում, Ռումինիայում ու Բալթյան երկրներում։