Կառավարությունը ՀԾԿՀ-ին ցույց չի տվել գազի գնի նվազեցման աղբյուրը
«Ուսումնասիրություններն ավարտել ենք, իրավական դաշտում մեր մոտեցումները ներկայացրել ենք կառավարությանը, բայց դեռևս լուծված չի ֆինանսավորման աղբյուրը, թե ինչի հաշվին մենք պետք է նվազեցնենք սոցիալապես անապահով խավերի սակագները, որպեսզի մյուս սպառողների համար լրացուցիչ բեռ չդառնա»,- այսօր Աժ-ում լրագրողների հետ ճեպազրույցում հայտարարեց Հանրային ծառայությունները կարգավորող հանձնաժողովի (ՀԾԿՀ) նախագահ Ռոբերտ Նազարյանը` պատասխանելով հարցին, թե ի՞նչ է արվել գազի գնի նվազեցման վերաբերյալ վարչապետ Կարեն Կարապետյանի հանձնարականի կապակցությամբ:
Ըստ նրա` կառավարությունը դեռևս չի մատնանշել ֆինանսավորման աղբյուրը: 168.am-ի հարցին, թե հանձնաժողովը կառավարությանը որքա՞ն է առաջարկել նվազեցնել գազի սակագինը, Ռ.Նազարյանը պատասխանեց.
«Որքան աղբյուրի մեծությունը կլինի, այդքան էլ կիջեցնենք: Եթե դեռևս չունենք, չգիտենք ինչ գումարի մասին է խոսքը, զրոյական վիճակ է այսօր, ինչի՞ մասին խոսենք»:
Ռոբերտ Նազարյանը նշեց, որ իր ենթադրությամբ՝ Ռուսաստանից մատակարարվող գազի սակագինը պետք է նվազի սահմանին:
Մեր հարցին, թե «Գազպրոմի» ղեկավար Ալեքսեյ Միլլերի այցից հետո ի՞նչ արդյունք կա, նվազելո՞ւ է սահմանին գազի գինը, ՀԾԿՀ նախագահը պատասխանեց, որ Միլլերի այցից որևէ տեղեկություն չունի:
Իսկ մեր հարցին` հնարավորություն տեսնո՞ւմ է, որ սահմանին իջնի գինը, Ռ.Նազարյանը նշեց, որ այդ մասին չի կարող ասել, որովհետև բանակցային կողմ չէ:
Հիշեցնենք, որ գազի էժանացումը կվերաբերի սոցիալապես անապահով մոտ 120 հազար ընտանիքների:
