Միջազգային մամուլի արձագանքը երևանյան իրադարձություններին
Երևանում կատարվող իրադարձությունները շարունակում են մնալ միջազգային մամուլի ուշադրության կենտրոնում, որը «Սասնա ծռեր» զինված խմբի կողմից ՀՀ ոստիկանության պարեկապահակետային ծառայության (ՊՊԾ) գնդի գրավման առաջին օրվանից շարունակում է ընթերցողներին տեղեկացնել Երևանում ծավալվող դեպքերի մասին:
Իրենց ակտիվությամբ դարձյալ աչքի են ընկնում ռուսական լրատվամիջոցները, որոնք օպերատիվորեն իրադարձային լուրեր են հրապարակում՝ օգտվելով հայկական մամուլի հրապարակումներից:
Բացի այդ՝ վերջին օրերին ռուսական լրատվամիջոցներում սկսել են ծավալուն՝ բավականին միակողմանի հոդվածներ հրապարակվել, որոնք դժվար է վերլուծություններ անվանել այն առումով, որ դրանք ներկայացնում են երևանյան իրադարձությունների խեղաթյուրված պատկերը՝ իրենց ցանկալի լույսի ներքո:
Այդ առումով բավական հավասարակշռված դիրքորոշում են ցուցաբերում արևմտյան լրատվամիջոցները, որոնք ներկայացնում են երևանյան իրադարձությունների ժամանակագրությունը՝ առանց չարախնդության, ինչը զգացվում է ռուսական որոշ ԶԼՄ-ներում:
Բավական է նայել միայն ռուսական հեղինակավոր RIA Novosti գործակալության և Gazeta.ru-ում հրապարակված հոդվածների վերնագրերը և ամեն ինչ պարզ կդառնա: Այսպես, RIA Novosti-ում հոդվածագիր Վլադիմիր Լեպեխինը հոդված է հրապարակել «Ինչպե՞ս են Հայաստանին հրում ՆԱՏՕ-ի վիշապի երախը» վերնագրով, որտեղ վերջինս կարծիք է հայտնում, թե «հայկական ապստամբությունը» Արևմուտքի փոխհատուցումն է, որի հատուկ ծառայությունները կանգնած են Թուրքիայում հեղաշրջման փորձի և հայկական իրադարձությունների հետևում: Հենց այդ պատճառով են, ըստ հոդվածագրի, արևմտյան քաղաքական գործիչները «չնկատելու տալիս Երևանի ահաբեկիչների գործողությունները՝ սպասելով իրենց համար շահավետ հանգուցալուծման»:
Դավադրությունների սիրահար հոդվածագրի կարծիքով՝ հայ հասարակությունը դեռ պատրաստ չէ հակազդելու եվրաամերիկյան սադրանքներին, որոնց հետ համագործակցում են նաև հայկական սփյուռքի որոշ ներկայացուցիչներ ԱՄՆ-ում և Եվրոպայում:
Gazeta.ru-ն, իր հերթին, «Հայաստանի նախագահն ու կառավարությունը գողանում են ժողովրդից» վերնագրով ծավալուն հոդվածով անդրադարձ է կատարել երևանյան այսօրվա իրադարձություններին:
Միջազգային լրատվամիջոցներից երևանյան իրադարձություններին ուշադիր հետևում է BBC-ն, որը մասնավորապես անդրադարձել է ՀՀ նախագահ Սերժ Սարգսյանի հայտարարությանը, թե զինված խմբի անդամները պետք է վայր դնեն իրենց զենքը:
Հայաստանյան իրադարձություններին անդրադարձել է նաև բրիտանական The Telegraph-ը, որը երևանյան դեպքերը բնութագրում է որպես «ճգնաժամային»: Պարբերականը մասնավորապես անդրադարձել է նախօրեին ոստիկանների և ցուցարարների միջև բախումներին, որի ժամանակ, ըստ ՀՀ ՆԳՆ-ի տվյալների, վնասվածք է ստացել 51 մարդ, որից 28-ը՝ ոստիկան:
Պարբերականը ուշադրություն է դարձնում այն փաստին, որ բախումները ոստիկանների հետ սկսվել են այն բանից հետո, երբ ցուցարարները քարեր են նետել ոստիկանների ուղղությամբ:
Նշվում է, որ ցուցարարները շարունակում են պահանջել ՀՀ նախագահի հրաժարականը, պահանջում են նաև ազատ արձակել ազատամարտիկ Ժիրայր Սէֆիլյանին:
Գերմանական Deutsche Welle-ն նույնպես անդրադարձել է երևանյան դրամատիկ իրադարձություններին: Նշվում է, որ հարյուրավոր ցուցարարներ իրենց աջակցությունն են հայտնում զինված խմբի անդամներին: Պարբերականը դարձյալ անդրադարձել է ոստիկանների և ցուցարարների միջև բախումներին՝ նշելով, որ վնասվածքներ են ստացել բազմաթիվ ցուցարարներ և ոստիկաններ:
BBC-ի ռուսական ծառայությունը, իր հերթին, անդրադառնում է այսօրվա իրադարձություններին՝ նշելով, որ զինված խմբի անդամները հրաժարվել են վայր դնել իրենց զենքերը: Նրանք պահանջում են Սերժ Սարգսյանի հրաժարականն ու նոր ընտրությունների անցկացում:
Ռուսական TASS գործակալությունը հաղորդում է, որ զինված խմբի անդամները ազատել են իրենց մոտ գտնվող բոլոր պատանդներին: Գործակալությունը հայտնում է նաև ՊՊԾ-ի տարածքի չեզոք գոտում ստեղծվելիք շուրջօրյա մամուլի կենտրոնի մասին:
Interfax-ն, իր հերթին, հայտնում է, որ ՀՔԾ-ն քրեական գործ է հարուցել ոստիկանների կողմից ծառայողական պարտականությունները կատարելիս պաշտոնական լիազորությունների չարաշահման մասին:
Նշվում է, որ որոշ ոստիկաններ Երևանի տարբեր վայրերից ոստիկանական բաժանմունքներ բերած ցուցարարների նկատմամբ բռնություններ են կիրառել՝ պատճառելով մարմնական վնասվածքներ:
