«Խաչատրյան եղբայրներ» ընկերության վերաբերյալ որոշումներն ընդունվեցին
ՀՀ կառավարությունն այսօր որոշեց «Խաչատրյան եղբայրներ» ՍՊԸ կողմից ապրանքների ներմուծման դեպքում ավելացված արժեքի հարկի գումարների վճարման ժամկետը երեք տարի ժամկետով հետաձգել: Կառավարության մեկ այլ որոշմամբ՝ «Խաչատրյան եղբայրներ» ՍՊԸ կողմից իրականացվող ներդրումային ծրագրի շրջանակներում ներմուծվող տեխնոլոգիական սարքավորումները, դրանց բաղկացուցիչ ու համալրող մասերը, հումքը և նյութերը ներմուծման մաքսատուրքից ազատվեցին:
Ըստ նախագծի հիմնավորման՝ «Խաչատրյան եղբայրներ» ՍՊԸ կողմից իրականացվում է ջրային ռեսուրսների հաշվին էլեկտրաէներգիայի արտադրության ներդրումային ծրագիր: Նախագիծը կառավորությունում ներկայացնող ՀՀ էկոնոմիկայի նախարար Արծվիկ Մինասյնն ասաց, որ ծրագրի իրականացման համար պահանջվող սարքավորումները ներմուծվել են Չինաստանից, քանի որ ԵԱՏՄ անդամ երկրների տարածքում ծրագրի իրականացման համար համապատասխան ցուցանիշներով և օգտակար գործողության գործակցով հիդրոագրեգատներ չեն արտադրվում:
Ըստ նրա՝ ընկերության նպատակն է ՀՀ Սյունիքի մարզի Ծղուկ համայնքում կառուցել 4 մգվտ փոքր հիդրոէներգոկասկադ, օգտագործելով նշված տարածքի գետերի պոտենցիալը` արտադրելով էլեկտրոէներգիա:
