Ուշադրություն. ադրեջանցիները զանգում են հայկական բջջային օպերատորների համարներից ու սկսում հարցեր տալ
«Ֆեյսբուք» սոցիալական ցանցում մի շարք օգտատերեր զգուշացնող գրառումներ են տարածում՝ հորդորելով քաղաքացիներին հեռախոսազրույցներում զգույշ լինել։
«Ժողովուրդ, հնարավոր է ձեր բջջայինի վրա հայկական կոդով անծանոթ համարներից զանգեր կամ հաղորդագրություններ գան, չպատասխանեք, ամենայն հավանականությամբ դա թշնամու կողմից ձեռնարկված գաղտնալսման փորձ է կատարվում: Եվ ընդհանրապես՝ ձեր բոլոր հեռախոսազրույցների մեջ շատ զգույշ և զուսպ եղեք»,- ասվում է զգուշացումներից մեկում:
Տարածված մեկ այլ հայտարարության մեջ խոսվում է այն մասին, որ ադրեջանցիները զանգում են հայկական համարներից ու սկսում հարցեր տալ։ Ընդ որում՝ շատ մաքուր հայերենով: Այս գրառման մեջ նշված էր նաև այն հեռախոսահամարը, որով քաղաքացին զանգ էր ստացել ադրբեջանցիներից: Սակայն հասկանալի պատճառներով հեռախոսահամարը չենք հրապարակում:
