«Միայն պալատի ներսում քայլեր ձեռնարկելն արդյունք չի տալու». «Նոր Հայաստանը» չի միանա «4+4+4» ձևաչափով ընթացող քննարկումներին
168.am-ի զրուցակիցն է «Հիմնադիր խորհրդարանի» նախագահի տեղակալ Վարուժան Ավետիսյանը
– Երեկ Ազգային ժողովում Ընտրական օրենսգրքի նախագծի վերաբերյալ ընթացող քննարկման ժամանակ ՀԱԿ խմբակցության ղեկավար Լևոն Զուրաբյանն իշխանություններին առաջարկեց ստեղծել 4+4+4 բանակցությունների ձևաչափ՝ ԸՕ նախագիծը քննարկելու և մշակելու համար: ՀՀ կառավարության աշխատակազմի ղեկավար–նախարար Դավիթ Հարությունյանը հայտարարեց, որ համաձայն են ստեղծել այդ ձևաչափը: Հնարավո՞ր է՝ «Նոր Հայաստան» ընդդիմադիր շարժումը ևս մասնակցի այդ քննարկումներին, և, առահասարակ, ի՞նչ կարելի է սպասել այդ քննարկումներից:
– Մենք չենք կարող մասնակցել այնպիսի քննարկումների, որտեղ գլխավոր ընտրակեղծարար ուժն արբիտրի դեր է կատարում: Ես ամբողջությամբ ծանոթ չեմ նյութերին, բայց կարծես թե պարոն Զուրաբյանն էլ դժգոհ էր այն ձևով իր առաջարկությունն ընդունելու և իրականացնելու ձևաչափից, որը տեղի է ունենում: Ես ինչքան հասկացա, շատ ուլտիմատիվ տոնով էին խոսում, որ՝ «մենք սա կընդունենք, նա չենք ընդունի, դուք ներկայացրեք՝ մենք կլսենք», իրենք արբիտրի դերում են իրենց պատկերացնում: Նման իրավիճակում մենք չենք կարող մասնակցել, իմաստ չունի մասնակցել նման բաներին, որովհետև ի սկզբանե ամեն ինչ պարզ է արդեն: Այս ամենն անհեթեթ է, դրան մասնակցելու որևէ իմաստ չկա: Արտահերթ ընտրությունների կարիք ունենք՝ առանց հանցավոր համագործակցության վերածված ՀՀԿ-ի:
– Օրերս Ժիրայր Սէֆիլյանը հայտարարեց, որ առաջիկայում բանակցելու եք ՀԱԿ-ի, Ստեփան Դեմիրճյանի, Աշոտ Մանուչարյանի, Պարույր Հայրիկյանի և Նիկոլ Փաշինյանի հետ՝ արտահերթ ընտրություններին մոբիլիզացիա իրականացնելու վերաբերյալ: Հիմա, փաստորեն, ՀԱԿ-ը համաձայնեց այդ ֆորմատով երկխոսության մեջ մտնել իշխանությունների հետ, դուք էլի պատրա՞ստ եք բանակցել ՀԱԿ-ի հետ:
– Մենք մեր հավանական գործընկերներին, այդ թվում՝ նաև ՀԱԿ-ին, չենք քննադատում և մեղադրում համակարգի ներսում պայքարելու համար: Չեմ կարծում՝ պարոն Զուրաբյանը չի ճանաչում սրանց, չի ճանաչում համակարգը ու չգիտի՝ ինչ արդյունք կարող է ստանալ: Այսինքն՝ համակարգի մեջ դու կարող ես պայքարել նվազագույն հնարավորի համար: Մարդիկ պայքարում են ու ճիշտ են անում: Մենք ասում ենք՝ խնդրեմ, պայքարեք խորհրդարանում: Բայց չէ՞ որ կա դրան զուգահեռ ճանապարհը, որ քաղաքական ուժերի մոբիլիզացիայի արդյունքում կարելի է ժողովրդին ոտքի հանել ու այս ճանապարհն էլ փորձել: Ինչո՞ւ զուգահեռաբար երկուսն էլ չանել, մենք այդտեղ հակասություն չենք տեսնում: Իրենց աշխատանքն անարդյունավետ է լինելու ներսում, եթե արտաքինից ճնշումը չլինի:
– Այս ընթացքում խոսե՞լ եք ՀԱԿ-ի հետ, գիտե՞ք իրենց տրամադրվածությունը, որքանո՞վ են իրենք պատրաստ միանալ ձեզ՝ գնալ արտահերթ ընտրությունների, որովհետև այս առաջարկով՝ իրենք կարծես այլ ֆորմատով են պատկերացնում պայքարը:
– Մարտի 1-ի համատեղ գործողություններից հետո հատուկ նման հանդիպում, քննարկում չի եղել. կլինի անշուշտ, բայց ես չեմ կարծում՝ թե՛ ՀԱԿ-ը, թե՛ մյուս ուժերը չեն պատկերացնում, որ հարկավոր է ժողովրդի ճնշումը համակարգի վրա, միայն պալատի ներսում քայլեր ձեռնարկելն արդյունք չի տալու: Հակառակը՝ հատկապես եվրոպական կառույցներին ներկայացնելու են, որ՝ «տեսե՛ք, ընդդիմադիրները մասնակցեցին, մենք ձևաչափ ստեղծեցինք՝ 4+4+4, և հավասար հիմունքներով մենք ստեղծեցինք այդպիսի՝ բոլորի կողմից ընդունելի նախագիծ, ամեն ինչ շատ լավ է, մենք գնում ենք դեպի ավելի ժողովրդավարացում»:
– Այսինքն՝ այս ձևաչափի ստեղծումը շոո՞ւ եք համարում, և, ըստ Ձեզ՝ այն ոչ մի արդյունք չի՞ տալու:
– Ընդդիմադիրների և քաղհասարակության ներկայացուցիչների կողմից շոու սարքելու որևէ միտում չեմ տեսնում, մարդիկ ուզում են հնարավորինս օգուտ բերել պետությանը և ժողովրդին, բայց ես ասում եմ, որ անարդյունավետ է լինելու: Իսկ որ ռեժիմն է ձգտելու դա շոուի վերածել, դա այդպես է:
