Սիրիացի փախստականը, ում հարվածել էր հունգարացի կին օպերատորը, աշխատանքի հրավեր է ստացել Մադրիդի մարզչական դպրոցի կողմից
Սիրիացի ֆուտբոլային մարզիչը, ում անցած շաբաթ ոտք էր գցել հունգարացի կին օպերատորը Հունգարիայի ու Սերբիայի սահմանին, աշխատանքի առաջարկություն է ստացել:
Մադրիդի մարզիչների CENAFE դպրոցը կօգնի Օսամա Աբդուլ Մոխսենին հիմնավորվել Իսպանիայում ընտանիքի հետ միասին: Մոխսենն արդեն Մադրիդ է տեղափոխվել Մյունխենից, հայտնում է BBC-ի ռուսական ծառայությունը:
Տեսանյութը, որտեղ կինը ոտք է գցում երեխային գրկին սիրիացի ներգաղթյալին, Twitter-ի իր էջում տեղադրել էր գերմանացի լրագրող Ստեֆան Ռիխտերը, ինչից հետո տեսագրությունը արագորեն տարածվել էր սոցցանցերում ու քննադատությունների ալիք բարձրացրել մարդկանց շրջանում:
Հունգարական N1TV հեռուստաալիքն ստիպված էր եղել աշխատանքից ազատել Պետրա Լազլոյին:
Ավելի ուշ Պետրան ներողություն էր խնդրել տղամարդուց իր արարքի համար, սակայն սիրիացի փախստականը Daily Mail-ին տված հարցազրույցում հայտարարել էր, որ չի կարող ներել նրան:
«Երբ ես ոտքիս հարված ստացա, սկզբում անգամ չհասկացա, թե ով դա արեց՝ ոստիկա՞նը, թե՞ օպերատորը: Ես պարզապես զգացի, որ կորցնում եմ հավասարակշռությունս ու ընկնում: Ինչպե՞ս կարող եմ ես նրան ներել»,- ասել էր տղամարդը:
