Դաշտում բեռնատար է այրվել. տուժածներից մեկը 10-ամյա երեխա է
Սեպտեմբերի 13-ին, ժամը 21.16-ին ահազանգ է ստացվել, որ Զառ-Գեղաշեն ավտոճանապարհին այրվում է «ԳԱԶ-53» մակնիշի ավտոմեքենա. լսվել է պայթյունի ձայն:
Դեպքի վայր է մեկնել մեկ մարտական հաշվարկ:
Պարզվել է, որ Զառ-Գեղաշեն ավտոճանապարհի մոտակայքում` դաշտամիջյան հատվածում, այրվում է «ԳԱԶ-53» մակնիշի 43 LS 486 պ/հ ավտոմեքենայի (վարորդ Սենիկ Գրիգորյան) շարժիչի հատվածը, վարորդի խցիկը, առջևի անվադողը և թափքը (մոտ 1 քմ) և առջևի մյուս անվադողը մասամբ. պայթյունի նշաններ չեն հայտնաբերվել:
Հրդեհը մեկուսացվել է ժամը 21.48-ին, մարվել` 21.58-ին:
Հրդեհի հետևանքով Ս. (ծնված 1946 թ.), Մ. (ծնված 1995 թ.) Գրիգորյանները և Մ. Հ.-ը (ծնված 2005թ.) տարբեր աստիճանի այրվածքներով հոսպիտալացվել են Աբովյան քաղաքի ԲԿ, այնուհետև` «Ճառագայթային բժշկության և այրվածքների հանրապետական գիտական կենտրոն». բժիշկները տուժածների առողջական վիճակը գնահատել են ծանր:
