Նախորդ տարիների համեմատ՝ այս ամառ ունենք հիվանդացությունների աճ. առողջապահության նախարարի տեղակալ

ՀՀ առողջապահության նախարարի տեղակալ Սերգեյ Խաչատրյանն այսօր լրագրողների հետ հանդիպման ընթացքում ասաց, որ նախորդ տարիների համեմատ՝ այս ամառ ունենք հիվանդացությունների աճ, ինչը պայմանավորված է շոգ եղանակով. «Իրավիճակը խստորեն վերահսկվում է, յուրաքանչյուր դեպքի վերաբերյալ ունենք մանրամասն տեղեկություններ և յուրաքանչյուր դեպքի վարման հետ կապված՝ ունենք մեր հստակ մոտեցումները»:

ՀՀ ԱՆ Հիվանդությունների վերահսկման և կանխարգելման ազգային կենտրոնի գլխավոր տնօրեն Արտավազդ Վանյանը նշեց, որ ամառային շոգ եղանակին մարդու օրգանիզմի վրա առավել մեծ ազդեցություն է ունենում երկու հիմնական գործոն՝ ջերմային գործոնը (ջերմաստիճանի բարձրացումը) և ուլտրամանուշակագույն ճառագայթումը. «Ուլտրամանուշակագույն ճառագայթների չափավոր ընդունումը խթան է հանդիսանում իմունային համակարգի, ոսկրային համակարգի, նյութափոխանակության, դիմադրողականության բարձրացման համար: Բայց երբ այդ քանակը չափավոր չէ, մբացասական ազդեցություն է լինում մարդու օրգանիզմի վրա: Ուլտրամանուշակագույն ճառագայթները ժամը 12:00-17:00-ն, իսկ վերջին օրերին՝ մինչև 19:00-ն առավել բացասական են ազդում և մարդկանց մոտ կարող են առաջացնել տարբեր տիպի տեղային այրվածքներ, որոնք մաշկի վրա ի հայտ են գալիս կարմրածության, այտուցի, բշտիկների տեսքով, կարող են առաջացնել նաև մաշկի չարորակ նորագոյացություններ՝ մելանոմաներ: Նշված ժամերին պետք է խուսափել արևի ուղիղ ճառագայթների տակ մնալուց»:

Ա. Վանյանի խոսքով՝ ջերմաստիճանի բարձրացումն առավել մեծ ծանրաբեռնվածություն է մարդու օրգանիզմի սրտանոթային, շնչառական համակարգերի համար. «Օրգանիզմի ջերմատվության հիմնական ուղին քրտնարտադրությունն է, որն ապահովում է ջերմատվության 85%-ը, այն կտրուկ ավելանում է շոգ եղանակներին՝ նպաստելով օրգանիզմի հովացմանը: Նորմալ օրերին 2-2.5 լիտր հեղուկ է գոլորշիանում, իսկ այս օրերին հասնում է մինչև 4 լիտրի, դրա համար պետք է օրական մինչև 3 լիտր հեղուկ օգտագործել՝ ջուր, թան, կեֆիր, կարող եք ջրի հետ մեկ կտոր կիտրոն օգտագործել, կարող եք օգտագործել թեյ, չի կարելի չարաշահել շաքար և կոֆեին պարունակող հեղուկները»:

Ամռան ամիսներին մեծանում է վարակիչ հիվանդությունների և սննդային թունավորումների առաջացման և տարածման վտանգը՝ պայմանավորված հիվանդությունների փոխանցողների բազմացման համար առավել նպաստավոր պայմաններով: Վարակներից խուսափելու համար Ա. Վանյանը խորհուրդ տվեց զերծ մնալ անհայտ ծագման սննդից, կրեմային հրուշակեղենից, որոնք միջավայր են հարուցիչների համար և պահպանել անձնական հիգիենան: